Komandante UPF, Superintende Euclides Belo, hamutuk ho Autoridade lokál suku Saburai, vizita Postu UPF Saburai. Imagen TATOLI/Sérgio da Cruz

BOBONARO, 24 jullu 2021 (TATOLI)–Polísia Nasionál Timor-Leste (PNTL) liuhosi Unidade Patrullamentu Fronteira (UPF) Kompaña Alfa postu Saburai, iha sesta (23/07) maizumenus tuku 03:00 madrugada, detein sidadaun iha suku Saburai, postu administrativu Maliana, munisípiu Bobonaro, bainhira tenta lori fahi hitu hakat fronteira bá Indonezia.

Sidadaun feto ida no mane ida ne’e orijen hosi suku Saburai, iha intensaun atu lori animál ba fa’an, maibé la konsege tanba UPF identifika no halo kedan apreensaun.

“Sasán sira agora ita aguarda no hein atu lori ba kuarentena Batugade,” Segundu Komandante UPF, Superintendente Asistente, Carlos Moniz Maia, hateten, iha postu Tunubibi, sábadu ne’e.

Enkuantu, sidadaun rua ne’e UPF entrega ona ba Komandu PNTL munisípiu Bobonaro hodi halo investigasaun.

Aleinde ne’e, iha kinta (22/07), UPF Kompaña Alfa postu Alto Lebos, kaptura sidadauk rua, ne’ebé orijen hosi suku Lebos, postu administrativu Lolotoe, munisípiu Bobonaro, ne’ebé uza kuda tula sigaru karton rua, ne’ebé hatama ilegalmente hosi Indonézia mai Timór.

“Sidadaun rua ho inisiál BM no IBT, no sasán entrega ona ba Komandu munisípiu Bobonaro hodi halo investigasaun,” Superintendente Asistente, Carlos Moniz, esplika.

Relasiona ho kestaun ne’e, Segundu Komandante UPF, afirma, membru sira kontinua kontrola movimentu iha liña fronteira, tanba ne’e, husu mós populasaun Bobonaro ne’ebe hela besik iha área ne’e, labele hala’o atividade merkadoria ilegál, tanba daudaun Governu preokupa hela ho vírus variante foun.

Tuir Segundu Komandante, maski hasoru difikuldade barak durante halo patrullamentu iha fronteira, maibé la hamate espíritu  tamba UPF nia knaar atu asegura soberania Timor-Leste.

“Bazeia ba Lei Orgánika PNTL, orienta ona UPF atu asegura liña fronteira, tanba ne’e ami sei halo patrullamentu rutina, nune’e ami orienta ona membru sira atu halo kontrola másimu ba fatin ne’ebé mak konsidera risku liu ba atividade merkadoria ilegál,” nia subliña.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here