MOQURA-X halo konferénsia imprensa iha salaun eis Kodim, suku Ritabou, sábadu (24/07). Imajen TATOLI/Sérgio da Cruz

BOBONARO, 24 jullu 2021 (TATOLI)–Movimentu Quadru Rezisténsia Apoiu Xanana (MOQURA-X), iha suku Ritabou, postu administrarivu Maliana, munisípiu Bobonaro, liuhosi konferénsia imprensa, deklara apoia Xanana Gusmão iha Eleisaun Prezidénsiál ne’ebé sei realiza iha marsu 2022.

“Ami deklara apoia Maun-Boot Xanana Gusmão no partidu Congresso Nacional de Reconstrução de Timor (CNRT) atu partisipa iha Eleisaun Prezidensiál tinan 2022 no Parlamentár iha tinan 2023,” Portavóz movimentu, Moises Ramos, deklara, iha salaun eis Kodim, iha suku Ritabou, sábadu ne’e.

Movimentu ne’e kompostu hosi kuadru Frente Armada, Frente Klandestina inklui Diplomátiku ne’ebé maihosi munisípiu 12 no Rejiaun Administrativa Espesiál Oé-cusse Ambeno (RAEOA).

Biban ne’e, MOQURA-X husu ba membru rezisténsia hotu ne’ebé espalla iha Timór laran tomak, atu hamutuk ho movimentu ne’e hodi kaer metin unidade nasionál hasoru Eleisaun Prezensiál, nune’e bele hatuur hikas Estadu Direitu Demokrátiku iha korridór Konstituisionál.

“Nu’udár sidadaun ne’ebé iha direitu konsagradu iha Konstituisaun Repúblika Demokrátika Timor-Leste, permite ami hodi hili organizasaun no polítika hodi ezerse ami-nia direitu sívika,” nia akresenta.

Nune’e mos, Prezidente MOQURA-X muníspiu Bobonaro, Paulo Moniz Maia ‘Fiar-an’, hateten, maski seidauk halo komunikasaun no kontaktu ho Xanana Gusmão, maibé hanesan movimentu ne’ebé forma hosi rezisténsia, nafatin apoia tamba  konsidera Xanana hanesan líder rezisténsia ne’ebé luta tinan 24 nia laran.

Tuir Paulo Moniz, ba oin sei komunika ho Xanana Gusmão atu kandidata-an ba Prezidente Repúblika ba períodu tinan 2022 to’o 2026, nune’e bele kompete iha Eleisaun Prezidensiál no movimentu ne’e bele konvida líder rezisténsia seluk hodi bele hamutuk luta ba povu nia moris di’ak no asegura ekonomia nasaun inklui kontribui ba dezenvolvimentu iha Timor-Leste.

“Se Maun Boot ba oin, ami sei hamriik iha nia kotuk, karik Maun Xanana la kandidata-an ba Prezidente Repúblika, maibé Maun hatudu ema rezisténsia oan, ami prontu apoia ema ne’ebé Maun Xanana hatudu,” nia hatutan.

Movimentu ne’e fiar katak Xanana Gusmão sei kandidata-an iha Eleisaun Prezidensiál, tamba MOQURA-X iha forsa atu mobiliza rezisténsia sira no firme nafatin ho prinsípiu.

Konferénsia imprensa ne’e partisipa hosi Portavóz nasionál MOQURA-X, Cesario Valente ‘Piloto’, Portavóz hosi Ermera, Afonso Aten brani, Portavóz hosi Liquiçá, Railos, inklui eis rezisténsia nia sira iha Bobonaro.

Paulo Moniz afirma, MOQURA-X nia ezisténsia la hare ba partidu, maibé atu mobiliza rezisténsia nia oan hotu hodi apoia líder rezisténsia sira ne’ebé uluk luta ba libertasaun nasionál, atu tau forsa hamutuk atu lori dezenvolvimentu ba povu tomak.

Maski nune’e, orgaun eleitorál seidauk anúnsia kalendáriu kampaña ba Eleisaun Prezidensiál no seidauk loke inskrisaun ba kandidatu sira.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here