Diskuru Prezidente FFTL, Francisco Jerónimo, iha abertura kongresu ba dala-VI, iha salaun City 8, Manleuana, sábadu (24/07). Imajen TATOLI/Francisco Sony

DILI, 24 jullu 2021 (TATOLI)—Federasaun Futeból Timor-Leste (FFTL) realiza kongresu ba dala-VI hodi aprezenta planu ba oin no halo alterasaun ba estatutu federasaun.

“Kongresu ne’e realiza hodi halo aprovasaun ba servisu ne’ebé federasaun sei halo ba oin no aprezenta mós ba asosiasaun sira. Ida-ne’e mak di’ak atubele komunga saida mak FIFA nia hakarak liuhosi estatutu ami-nia no asosiasaun FIFA, AFC no AFF nian,” Prezidente FFTL Francisco Jerónimo, hateten, iha salaun City 8, Manleuana, sábadu ne’e.

Iha biban ne’e, halo mós alterasaun ba artigu balun iha estatutu federesaun kona-ba atu labele halo boot tan estrutura FFTL, bainhira iha tinan ne’e, sé mak sai hanesan Prezidente, tenke iha de’it vise ida, enkuantu agora iha vise tolu.

Aleinde ne’e, halo mudansa mós ba estatutu Prezidente, ne’ebé iha nia mandatu tuir mai tenke iha limitasaun to’o de’it períodu tolu no labele liu.

Enkuantu, iha estatutu anteriór la ko’alia kona-ba mandatu Prezidente FFTL, tanba ne’e inisiativa Prezidente Francisco Jerónimo atu tenta ko’alia ho ezekutivu sira atu halo mudansa totál.

Durante kongresu, estrutura FFTL informa ba asosiasaun sira kona-ba serbisu ne’ebé realiza ona iha tinan 2020, aprezenta relatóriu tinan-ida, finanseira, estatutu no ikus liu taka ho votasaun.

Iha biban ne’e, Prezidente Asosiasaun Futeból Manufahi (AFM) Arão Noe, hateten, kongresu ne’e importante tebes.

“Ohin ami mai partisipa tanba hanesan membru FIFA ita tenke halo tuir saida mak organizasaun haruka, nune’e ita bele lori futeból ba oin no haree progresu, ita haree futeból Timor-Leste bele la’o ba oin,” nia dehan.

Nia husu ba FFTL labele foku liu ba asosiasaun sira ne’ebé iha Dili laran, maibé tenke tau atensaun mós ba asosiasaun futeból sira iha munisípiu.

“Asosiasaun sira iha munisípiu ne’e presiza fundu, ne’ebé bele tau-matan mós ba ami, labele buat hotu sentralizadu de’it iha Dili. Atu re-ativa asosiasaun sira iha munisípiu ho atividade barak, tenke iha fundu ba munisípiu atu eleva ita-nia jogadór sira-nia kapasidade,” nia subliña.

Iha sorin seluk Prezidente Asosiasaun Futeból Viqueque, Cosme Sarmento, konsidera kongresu  importante tanba parte hotu bele tuur hamutuk hodi diskute hamutuk futuru futeból iha Timor–Leste tuir padraun FIFA nian.

“Parte hotu partisipa hodi fó hanoin ne’e importante hodi haree hamutuk saida mak atu halo ba oin no saida mak ita liu ona iha futeból,” nia dehan.

Entretantu, atividade futeból iha Viqueque ladún la’o ho másimu tanba situasaun pandemia.

“Tinan hirak ba kotuk osan ladún iha, maibé atividade ita hala’o, maibé ba tinan rua ba kotuk labele hala’o atividade tanba ita hotu hatene COVID-19 la fó fatin,” nia hatutan.

Kongresu ne’e, partisipa hosi asosiasaun 17 hosi Dili Leste, Dili Oeste, Baucau, Manufahi, Liquiçá, Viqueque, Oé-cusse, Covalima, Aileu, Ainaro, Manatuto, Lautém, Bobonaro, Ermera, Asosiasaun Arbitrajen, Treinadór, no Asosiasaun Futeból Femenina.

Jornalista : Hortencio Sanchez

Editora      : Julia Chatarina

HAKEREK NO HATÁN

Please enter your comment!
Please enter your name here