Fundadór Fundasaun Falur Rate Laek no ho Diretór Fundasaun Hadomi Timor, Abrão Monteiro, troka nota entendimentu, iha salaun Fudasaun Falur Rate Laek, Mandarin, sabadu (07/24). Imajen TATOLI/Francisco Sony

DILI, 24 jullu 2021 (TATOLI)—Fundasaun Rate Laek, iha sábadu ne’e, asina nota entendimentu ho Fundasaun Hadomi Timor hodi hametin kooperasaun no garante sustentabilidade fundasaun rua ne’e ba futuru.

Fundadór Fundasaun Falur Rate Laek. Imajen TATOLI/Francisco Sony

Fundadór Fundasaun, Falur Rate Laek, hateten, fundasaun rua nia objetivu mak fó serbisu ba ema, investe iha edukasaun, halo peskiza kona-ba dadus istóriku no apoia sosiál ba komunidade.

“Fundasaun rua ne’e kiik no kiak, tanba ne’e mak ami buka-malu atu serbisu hamutuk, nune’e bele forsa iha atuasaun hanesan fó formasaun hodi ajuda Governu investe iha edukasaun, halo peskiza ba ita-nia istória rezisténsia no introdús programa apoia sosiál ba komunidade,” Falur informa ba jornalista sira, iha edifísiu Fundasaun Rate Laek, Mandarin, sábadu ne’e.

Fundadór Fundasaun Falur Rate Laek no ho Diretór Fundasaun Hadomi Timor, Abrão Monteiro, troka nota entendimentu, iha salaun Fudasaun Falur Rate Laek, Mandarin, sabadu (07/24). Imajen TATOLI/Francisco Sony

Nia esplika, akordu ne’e sei bele halo revizaun mínimu fulan-neen hafoin implementasaun programa ne’ebé introdús hosi fundasaun rua.

Nune’e mós, akordu ne’e sei bele halo revizaun bainhira fundasaun ida hato’o ninia pedidu atu hadi’a asuntu ne’ebé nesesária.

“Parseria ne’e sei termina ka hanaruk konforme konkordánsia ka pedidu terminasaun hosi Fundasaun Hadomi Timor no Fundasaun Falur Rate Laek,” esplika.

Diretór Fundasaun Hadomi Timor, Abrão Monteiro. Imajen TATOLI/Francisco Sony

Iha biban hanesan, Diretór Ezekutivu Fundasaun Hadomi Timor, Abrão Monteiro, konsidera fundasaun mai ho funsaun atu muda konsiénsia foin-sa’e sira, nune’e bele adapta ba evolusaun teknolojia liuhosi formasaun.

“Ami introdús programa capacity building, liuhosi formasaun informátika ba sosiedade sivil no arkitetura. Daudaun ne’e, ami iha ona planu halo formasaun lian Korea tanba kursu lian ne’e joven sira iha interese atu tuir,” nia tenik.

Jornalista : Evaristo Soares Martins

Editora      : Julia Chatarina

HAKEREK NO HATÁN

Please enter your comment!
Please enter your name here