Kongresu FFTL ba dala-VI, iha salaun City 8, Manleuana, sábadu (24/07). Imajen TATOLI/Francisco Sony

DILI, 24 jullu 2021 (TATOLI)—Federasaun Futeból Timor – Leste (FFTL) realiza kongresu anuál ba dala-VI no iha biban ne’e kongresista sira halo votasaun ba envolvimentu asosiasaun foun rua, ne’ebé pasa ho rezultadu votu a-favór 13, kontra rua no abstensaun rua.

Nune’e, asosiasaun foun mak hanesan Asosiasaun Futsál Timor-Leste (AFTL) Assosiasaun Futeból Juvenil Timor-Leste (AFJTL).

Prezidente AFJTL Gregório Correia, hateten, asosiasaun ne’e halibur jogadór kiik-oan sira, tanba ne’e tenke adere ba FFTL hodi hetan atensaun másimu no sai jogadór ne’ebé profisionál.

“Ami tama ona iha FFTL no ami sei hakruk ba estrutura ne’ebé iha ona, ami la’o nafatin hanesan baibain no halo treinu iha sentru juvenil,” Prezidente asosiasaun dehan iha salaun City 8, Manleuana, sábadu ne’e.

Tanba ne’e, asosiasaun ne’ebé iha FFTL hamutuk 19 no ba oin asosiasaun foun rua ne’e iha ona direitu hodi partisipa iha kongresu no iha direitu absoluta ba finansiamentu hosi federasaun hodi hala’o atividade.

Iha fatin hanesan, Vise-Prezidente AFTL, Ivan Alves, konsidera envolvimentu iha asosiasaun atu lori futsál ba ema hotu.

 “Ita-nia hakarak lori futsál ba oin, tanba kleur ona ita sempre partisipa iha liga internasionál futsál, ne’ebé realiza hosi AFF, Timor-Leste sempre partisipa, entaun atu dezenvolve di’ak liután tenke hamutuk ho FFTL,” nia akresenta.

Tuir nia, daudaun AFTL halo hela liga futsál iha nível nasionál, tanba ne’e bainhira pandemia laiha ona mak sei hamutuk ho FFTL atu kria jogu futsál siha munisípiu hodi dezenvolve talentu joven sira.

Nune’e, bainhira hetan konvite partisipa iha jogu futsál internasionál sira, Timor-Leste bele preparadu atu ba kompete.

Jornalista : Hortencio Sanchez

Editora     : Julia Chatarina

HAKEREK NO HATÁN

Please enter your comment!
Please enter your name here