Diretór Ezekutivu CNC, Hugo Maria Fernandes. Imajen TATOLI/Francisco Sony

DILI, 24 jullu 2021 (TATOLI)–Centro Nacional Chega (CNC), iha sesta (23/07) ne’e, partisipa iha aniversáriu Komisi Kebenaran dan Persahabatan (KKP) Indonénsia no Timor-Leste ba dala-13 via virtuál (zoom), ne’ebé halo diskusaun kona-ba ‘buka ema lakon’.

Diretór Ezekutivu CNC, Hugo Maria Fernandes, hateten, razaun partisipa komemorasaun ne’e tanba maluk sira hosi ‘Grupu Traballu Ema Lakon’ iha Indonézia no Timor-Leste, kompostu hosi organizasaun sosiedade sivil sira hanesan AJAR, ACbit, Cruz de Vermelha Timor-Leste (CVTL), CNC, kontras Sulawesi, IKOHI, Lembaga Bantuan Hukum (LBH) Bandung, Solidaritas Korban Pelanggaran (SKP-HAM) no seluk tan mak organiza. 

“Entaun CNC nia partisipasaun iha virtuál hamutuk ho maluk sosiedade sivil hosi Indonézia, atu ko’alia kona-ba reflesaun ba tinan-13, ne’ebé ita rona rekomendasaun KKP kona-ba buka ema lakon, no Governu país rua haree la’o to’o iha ne’ebé ona,” Diretór Ezekutivu CNC informa ba Agência TATOLI, via telefónika, sábadu ne’e.

Iha rekomendasaun KKP, foku liu ba ema lakon, tanba inisiativa ne’e hahú loke prosesu desde tinan 2018, ne’ebé komisaun halo rekomedasaun atu país rua harii komisaun ida buka tuir ema lakon, maibé to’o agora komisaun seidauk harii.

“Inisiativa ne’ebé durante ne’e la’o, tanba organizasaun sosiedade sivil sira hosi Indonézia no Timor-Leste hahú iha tinan 2011 to’o iha 2017, nune’e hamosu CNC, tanba ne’e ami tama ekipa buka ema lakon liuhosi fó apoiu ba sosiedade sivil iha país rua hodi buka tuir timor-oan ne’ebé lakon lori bá Indonézia,” nia akresenta.

Kona-ba buka ema lakon hosi nasaun ida ba nasaun seluk, tuir rekomendasaun KKP, tuir loloos hosi Ministériu Negósiu Estranjeiru Kooperasaun (MNEK) país rua mak responsabiza implementa no lidera.

“Maibé, hosi tinan 2018 to’o agora, negosiasaun ofisiál hosi Governu ba Governu ne’e ladún la’o, iha Indonézia to’o iha tinan 2016, iha desizaun dekretu Prezidente Repúblika nian, maibé hotu iha tinan ne’e kedan no Timor-Leste iha tinan 2017, CNC mak hala’o, maibé ami labele la’o mesak, tanba buka ema lakon tenke envolve MNEK país rua nian,” nia haktuir.

Durante tinan 13 KKP eziste, servisu ne’ebé Timor-Leste no Indonézia halo mak kona-ba ema lakon durante funu, CNC rasik identifika hamutuk ema 4.000 no maluk sosiedade sivil sira iha Indonézia ajuda buka tuir hahú iha 2011 to’o 2019 konsege hetan hamutuk na’in-170.

Enkuantu, durante ne’e hala’o atividade barak maibé agora konsentra liu mak reunifikasaun ema lakon, entaun hosi númeru 170 ne’e lori sira fila mai halo reunifikasaun hasoru família sira to’o iha tinan 2019  foin mak na’in-80.

“Maibé sira hanesan ema Indonézia ona, entaun sira mai hasoru de’it família no filafali no sira seluk loloos ne’e tinan 2020 atu lori tan mai, maibé tanba pandemia entaun la konsege,” nia hatutan.

Tanba ne’e, ba oin atu hetan ema lakon hamutuk 4.000, tuir Diretór Ezekutivu CNC, presiza Governu país rua fó apoiu maka’as hodi buka lalais tanba rekursu Indonézia buka tuir ema limitadu.

“Entaun, importante ita presiza agora MNEK Timor-Leste hatama rekomendasaun sira ne’e ba ajenda, nune’e ko’alia ho Indonézia atu fó atensaun ba prosesu sira ne’e, tanba horiseik iha diskusaun virtuál, Ministra MNEK la partisipa, maibé delega Asesór de’it hodi foti pontu importante atu fó hatene ba Ministra, espera iha rezultadu,” nia tenik.

Diskusaun virtuál partispa hosi sosiedade sivil Indonézia no reprezentante Governu MNEK Indonézia, Direitu Umanu no Komisaun Direitu Umanu Indonézia, enkuantu hosi parte Timor-Leste iha sosiedade sivil, Reprezentante MNEK, CNC no entidade seluk tan.

Jornalista : Arminda Fonseca

Editora     : Julia Chatarina

HAKEREK NO HATÁN

Please enter your comment!
Please enter your name here