Vise-Ministru Edukasaun, Juventude no Desportu (MEJD), António Guterres. Imajen TATOLI/Sérgio da Cruz

BOBONARO, 23 jullu 2021 (TATOLI)—Vise-Ministru Edukasaun, Juventude no Desportu (MEJD), António Guterres, konsidera presiza esforsu hasa’e nível edukasaun profesór sira.

“Ita presiza tebes tulun hasa’e profesór hotu nia grau edukasaun ba nível Baxarelatu. Iha tinan oin Governu sei tau planu atu kontinua formasaun, nune’e tinan 2023 ita-nia profesór sira ne’ebé sidauk hetan oportunidade bele ramata hotu,” Vise-MEJD hato’o asuntu ne’e durante halo diskursu iha abertura Estájiu Pedagojika Profesór na’in-431 ba nível Baxarelatu, iha jináziu munisipál Bobonaro, sesta ne’e.

Tuir governante ne’e, formasaun ne’e atu hasa’e koñesimentu profesór sira tanba dezenvolvimentu iha setór edukasaun nu’udar kondisaun esensiál ba prosperiedade, progresu sosiál inklui hasa’e nível ekonomia iha Timor-leste.

Vise-Ministru nota katak, desde fofoun tama independénsia to’o agora, dezenvolvimentu rekursu umanu iha setór edukasaun sei naton, tanba ne’e Governu sei kontinua esforsu atu prepara profesór sira ho kualidade, tuir lei baze edukasaun numeru 14/2018 ne’ebé determina ona profesór hotu iha Timór laran tomak nia nível ensinu tenke ho grau akadémiku Baxarelatu, Lisensiadu to’o Mestradu.

“Ministériu Edukasaun Juventude no Desportu asume responsablidade boot, ne’ebé ho papél determinante no pertinente tebes hodi garante asesu ba ensinu ho kualidade, ne’ebé prevee ona iha planu estratéjia nasionál ba edukasaun tinan 2011 to’o 2030, ne’ebé mak implika no aposta ba formasaun dosente sira,” nia subliña.

Iha biban ne’e, Vise-Ministru agradese formadór no dosente sira hosi Universidade Nasionál Timor Lorosa’e (UNTL), ne’ebé durante ne’e fó dedikasaum tomak hodi mellora ona koñesimentu profesór sira, tanba profesór mak ajente transformadór ba dezenvolvimentu iha Timor-leste.

Aleinde ne’e, membru ezekutivu ne’e konsidera mós Instituto Nacional de Formação de Docentes e Profissionais da Educação de Timor-Leste (INFORDEPE) iha papél importante tebes, tutela ba MEJD, ne’ebé hanesan entidade ida responsável ba formasaun profesór no asume forma ba implementasaun polítika edukativa, bodik ba edukasaun ne’ebé haree ba problema sosiál.

Durante ne’e, INFORDEPE dezenvolve rekursu ba formasaun profesionál no kontinua prepara profesór iha nível hotu, ne’ebé mak integra iha sistema edukasaun hodi garante atualizasaun koñesimentu ba dezenvolvimentu no mellora efetividade ensinu iha eskola, hodi posibilita labarik hotu bele simu matéria ho kualidade, efetivu e efikásia.

Tinan ne’e, MEJD liuhosi INFORDEPE haruka profesór kontratadu nível nasionál hamutuk 2.595 halo kursu Baxarelatu, liuhosi Estájiu Pedagojika iha ida-idak ninia sentru.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here