Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 23 jullu 2021 (TATOLI)—Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agostinho Siqueira “Somotxo” hateten Timor-Leste tenke kontinua aplika deklarasaun estadu emerjénsia to’o kombate surtu COVID-19.

Notísia Relevante: PR Lú Olo dekreta Estadu Emerjénsia ba dala XV

Nia hateten, atu suspende ema-nia direitu tenke liuhosi estadu emerjénsia ne’ebé previstu iha Konstituisaun RDTL 95 númeru 2 alínea n katak, suspensaun garantia konstitusionál nian no mós deklarasaun estadu serku ho tán estadu emerjénsia.

Eis Ministru Defeza ne’e subliña, lei hotu-hotu iha Timor-Leste laiha dalan atu supende ema-nia direitu maibé só deklarasaun emerjénsia, nune’e deklarasaun estadu emerjénsia lakohi ka hakarak tenke halo.

“Deklarasaun estadu emerjénsia tenke nafatin to’o pandemia COVID-19 ne’e ramata. Aora serka sanitária no konfinamentu obrigatóriu iha ita-nia rai laran ne’e, ita tenke hasai hodi kombate movimentu ilegál sira liu-liu iha área fronteira,” Prezidente Komisaun B ne’e informa ba jornalista sira iha resintu Parlamentu Nasionál, sesta ne’e.

Nia hatutan, deklarasaun estadu emerjénsia mak fó dalan ba Governu hodi hamosu regra sira hanesan serka sanitária no konfinamentu obrigatóriu jerál.

Vise-Prezidente Parlamentu Nasionál, Deputadu Luis Roberto da Silva, hateten estensaun estadu emerjénsia ba dala-XVI ne’e nesesáriu tanba COVID-19 seidauk hotu.

“Ita haree nafatin ba iha moras ne’ebé mak iha, estadu emerjénsia estende ona ba dala-15 no lakleur tama ona dala-16, entaun importante ba estadu tenke deklara estadu emerjénsia,” nia dehan.

Deputadu Bankada Kmanek Haburas Unidade Nacional Timor Oan (KHUNTO) ne’e argumenta, estadu emerjénsia ne’e parte ida estadu salva sidadaun sira hosi surtu COVID-19.

“Ita tenke antesipa nafatin ba moras ne’e, atu nune’e timor-oan mós  halo nafatin prevensaun. Entaun, ita-nia Governu no parlamentu halo nusa para halo prevensaun ba saúde públiku,” nia fundamenta.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here