Komunidade simu Sekretáriu Estadu Komunikasaun Sosial (SEKOMS), Merício Juvinal dos Reis ‘Akara’ membru Governu balun inklui entidade relevante, iha aldeia Soikili, sesta (23/07). Imajen TATOLI/Natalino Belo

LAUTÉM, 23 jullu 2021 (TATOLI)—Sekretáriu Estadu Komunikasaun Sosial (SEKOMS), Merício Juvinal dos Reis ‘Akara’, apresia vontade mídia sira ne’ebé direitamente halo atividade jornalizmu iha área rurál hodi divulga informasaun ba nasionál.

Governante ne’e hato’o kestaun ne’e, bainhira halo diálogu komunitáriu liuhosi programa ‘Naroman ba Suku’, aldeia Soikili, suku Parlamentu, postu administrativu Lautém, munisípiu Lautém.

“Apresia mídia sira tanba iha fatin izoladu hanesan ne’e, sira nafatin hala’o atividade kobertura tanba sira mak meiu ida atu transmiti ita-nia ideia sira ba nasionál no mundu. Sira hanesan eroi foun ba dezenvolvementu tanba divulga informasaun,” Sekretáriu Estadu hateten iha aldeia Soikili, sesta ohin.

Tuir Akara, Naroman ba Suku atu lori informasaun, esperiénsia no prespetiva seluk, tanba ne’e, SEKOMS hamutuk ho membru Governu balun halo diálogu atu fahe informasaun no prioridade, atu povu akompanã lala’ok governasaun.

Notísia relevante: Diálogu komunitáriu iha suku Euquise, membru Governu husu prepara proposta

“Diálogu ida-ne’e nia xave importante mak ita atu transmite informasaun loloos ba malu no ami rona informasaun no haree realidade hosi ita boot sira,” nia akresenta.

Entretantu, Naroman ba Suku hanesan programa ne’ebé introdús hosi SEKOMS ho nia objetivu atu hakbesik Governu iha povu nia le’et hodi partilla informasaun ba povu ho loloos kona-ba progresu, planu no ezekusaun polítika dezenvolvementu iha nasaun.

Diálogu ne’e partisipa mós hosi Vise-Ministra Solidariedade Sosiál no Inkluzaun, Signi Candrawati Verdial, Vise-Ministru Obra Públika, Nicolao Lino Freitas Belo, Vise-Ministru Agrikultura no Peska, Abílio Xavier de Arújo, Prezidente Konsellu Imprensa, Virgílio Guterres, inklui autoridade munisípiu Lautém, líder komunitáriu inklui komunidade lokál.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here