MESSK troka nota entendimentu ho operadór telekomunikasaun tolu iha prosesu distribui pulsa internet ba estudante universidade sira, sesta (23/07). Imajen Tatoli/Francisco Sony

DILI, 23 jullu 2021 (TATOLI)– Diretór Jerál Administrasaun Finansas, Ministériu Ensinu  Superiór, Siénsia no Kultura (MESSK), Hernánio da Costa, sesta ne’e, asina kontratu ho operadór telekomunikasaun tolu iha Timor-Leste hodi distribui pulsa internet ba estudante universidade sira iha territóriu nasionál.

Notísia Relevante : MESSK sei prosesa tan subsídiu propina no pulsa internet iha faze daruak

“Ami asina kontratu rua  ho kompañia telekomunikasaun tolu; Telemor, Timor Telecom bo Telkomcel, ba buat rua ida mak atu apoiu pulsa ba estudante universidade sira hotu iha Timor-Leste ne’ebé akreditadu hosi MESSK no akordu segundu mak atu kria liña internet ba ensinu superiór privadu sira, la inklui UNTL,” Diretór Jerál Administrasaun Finansas MESSK, Hernánio da Costa, informa ba jornalista sira hafoin asina akordu ho operadór telekomunikasaun tolu ne’e iha salaun enkontru MESSK nian iha Dili.

Estudante ne’ebé rejista iha MESSK hamutuk 64.000-resin hosi universidade 17 iha territóriu nasionál ho númeru telephone estudante sira-nian.

“Ba iha Telkomcel ita sei fó pulsa ba estudante hamutuk 5.000-resin, ba Telemor 23.000-resin no Timor Telecom 9.000-resin. Total estudante 30.000-resin mak sei simu iha faze da-uluk nian, no seluk sei hein tuir tan tanba númeru ne’e boot purvolta 64.000-resin benefisiáriu,” Hernánio da Costa informa.

Estudante sira sei simu pulsa hosi operadór tolu ne’e durante fulan tolu hahú jullu-setembru kada fulan $10.00 ba estudante ida hodi nune’e estudante sira utiliza ba prosesu aprendizajen.

Mekanizmu transfere pulsa tuir kontratu ne’ebé MESSK  halo ho operadór telekomunikasaun tolu ne’e maka  transfere direita ba estudante sira-nia númeru telemovel ida-idak.

Ba instalasaun rede  internet gratuita ba universidade privadu sira ne’ebé la inklui UNTL atu ajuda estudante sira bele hala’o estudu no peskiza ba matéria eskola nian no seluk tan iha arredores universidade sira.

Prosesu instalasaun internet ba universidade privadu sira hahú jullu-dezembru 2021 ho nia kustu hamutuk $1.500 kada fulan.

Diretór Informátika Timor Telecom, Ladislau Eustáquio de Sousa Saldanha. Imajen Tatoli/Francisco Sony

Iha fatin hanesan Diretór Sistema no Informátika Timor Telecom, Ladislau Eustáquio de Sousa Saldanha, esplika inisiativa ne’ebé MESSK halo hodi asina kontratu ho operadór telekomunikasaun tolu ne’e di’ak tebes hodi apoiu estudante sira bele estuda online ka eskola online.

“Ida ne’e inisiativa di’ak ida hosi Governu liuhosi MESSK. Ami mós haree durante ne’e estudante sira hela de’it iha uma, laiha pulsa atu sira aprende ka partisipa ativa iha  aula online, entaun ida ne’e inisiativa di’ak,”  Ladislau Saldanha tenik.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here