Profesór kursu baixarelatu edukasaun na'in 431 iha Bobonaro ne’ebé atu hahú estájiu pedagójika, sesta (23/07/21). Imajen Tatoli/Sérgio da Cruz.

BOBONARO, 23 jullu 2021 (TATOLI)—Profesór na’in 431 hosi Universidade Nasionál Timor-Leste (UNTL) ne’ebé hala’o hela kursu baixarelatu edukasaun, iha munisípiu Bobonaro, hahu estájiu pedagójika durante fulan tolu.

Vise-Ministru Edukasaun Joventude no Desportu, António Guterres, agardese ba dosente-sira ne’ebé dedika-an  tomak durante tinan tolu, atu bele ajuda hadi’a kualidade edukasaun iha Timor-Leste (TL).

Notísia relevante:2021, serbisu edukasaun munisípiu Bobonaro implementa projetu 23

“Ha’u fiar katak, ita boot sira sei uza oportunidade ne’e ho di’ak, nune’e bele fó edukasaun ida ne’ebé di’ak liu tán ba ita-nia oan sira iha futuru,” António Guterres  hato’o mensajen ne’e iha abertura estájiu pedagójika iha Jináziu Munisipál Bobonaro, sesta ne’e.

Governante ne’e mós promete katak, Governu sei kontinua esforsu atu hadi’a nível edukasaun profesór-sira nian iha Timor-Leste.

Nia rekoñese katak, desde independénsia mai to’o agora, dezenbolvimentu rekursu umanu iha setór edukasaun sei natón, maski nune’e Governu sei kontinua esforsu atu prepara professór-sira ho kualidade tuir lei baze de edukasaun númeru 14/2018 ne’ebé determina ona katak, profesór hotu-hotu iha Timor laran tomak nia nível ensinu tenke ho titulár grau akadémiku baixarelatu ka lisensiatura to’o mestradu.

Iha fatin hanesan, Diretór Instituto de Formação dos Docentes e Profissionais da Educação (INFORDEPE Polo Maliana, Domingos da Costa Tavares, hateten estájiu ne’e hanesan atividades akadémika ida, tanba ne’e profesór-sira ne’e kompleta ona kréditu 180 durante tinan tolu no sei halo tan prátika atu bele hakerek relatóriu finál kursu.

Estajiária, Antónia Amaral kontente no prontu atu halo estájiu profesionál, tanba liu hosi kursu ida-ne’e mak bele muda sira-nia estatutu hosi profesór voluntáriu, kontratadu ba profesór permanente.

Profesór ne’ebé kursu baixarelatu edukasaun no formasaun ba primeiru no segundu síkulu ensinu báziku na’in 431, mai hosi postu administrativu Atabae na’in 49, Balibo 29, Bobonaro 162, Cailaco 27, Loloto’e 69 no Maliana 93.

Profesór hirak-ne’e sei hala’o estájiu profesionál iha ida-idak nia-fatin durante fulan tolu no sei hetan akompañamentu hosi formadór-sira.

Kursu formasaun baixarelatu ba profesór rejime kontratadu ne’e hanesan akordu kooperasaun entre INFORDEPE, UNTL no Ministériu Edukasaun Joventude no Desportu (MEJD) ne’ebé asina iha 2017 nia rohan ho objetivu atu prepara rekursu umanu iha setór edukasaun, nune’e bele hadi’a kualidade edukasaun iha Timor-Leste.

Tinan ne’e, MEJD liuhosi INFORDEPE haruka profesór kontratadu hala’o kursu baixarelatu edukasaun nível nasionál hamutuk 2.595 ba estájiu Pedagójika iha ida-idak nia sentru.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here