Imajen/Facebook: Quito Belo.

DILI, 23 jullu 2021 (TATOLI)—Prezidente Repúblika liuhosi Xefe Kaza Sivíl Prezidénsia Repúblika, Francisco Maria de Vasconcelos hateten, sesta ne’e atribui sertifikadu apresiasaun ba juri no manan-na’in sira-ne’ebé fó nia kontribuisaun iha Kompetisaun Múzika Rezisténsia liuhosi festivál arte no kultura. 

Notísia Relevante: Prezidénsia Repúblika sei realiza festivál arte no kultura 2020

Xefe Kaza sivil hateten, jerasaun foun sira liu-liu artista timor-oan sira tenke hatudu prestasaun di’ak hodi hametin no haburas arte no kultura iha Timor-Leste.

“Ohin, ita atribui sertifikadu apresiasaun ba manan-na’in sira ne’ebé kompete iha festivál arte no kultura tinan kotuk ne’e. Ita fiar katak jerasaun foun sira sei hutudu prestasaun no lian ne’ebé di’ak hodi bele hametin no haburas di’ak liután arte no kultura iha Timor-Leste,” Xefe Kaza Sivíl informa ba jornalista sira, iha serimónia atribuisaun sertifikadu apresiasaun hosi Prezidente Republika ba manan-na’in no juri kompetisaun muzika rezisténsia sira, iha Palásiu Nobre, Lahane, Dili.

Xefe Kaza Sívil apela ba manan-na’in sira atu labele para de’it iha ne’e maibé kontinua mantein hodi kompete bainhira iha tan festivál ruma, maibé ida-ne’e depende ema ida-idak nia esforsu tanba hanoin katak inísiu halo ida-ne’e no futuru sei iha fini ne’ebé di’ak liu mosu barak liután.

Atribuisaun sertifikadu apresiasaun no rekoñesimentu hosi Prezidente Repúblika ba timor-oan sira-ne’ebé fó kontribuisaun ba dezenvolvimentu ba arte no kultura Timor-Leste nian ne’e, loloos ne’e halao iha utubru tinan kotuk maibé tanba pandemia COVID-19 entaun adia tiha to’o ohin loron.

Imajen/Facebook: Quito Belo.

“Avaliasaun ba atividade festivál kulturál tuir loloos ne’e halo iha tinan kotuk hafoin fulan-outubru festivál ne’e hala’o. Maibé iha momentu ne’ebá iha pandemia COVID-19 ne’e maka’as tebes entaun ita adia to’o mai inísiu tinan ne’e COVID-19 sa’e maka’as. Agora moras komesa redús ona entaun Prezidente Repúblika hateten di’akliu halo avaliasaun ida tanba iha tempu besik mós iha fali tan festivál,” nia dehan.

Sekretáriu Estadu Arte no Kultura (SEAK), Teofilo Caldas, husu ba manan-na’in sira atu kontinua ho talentu ne’ebé mak iha, nune’e karik iha tinan oin mak iha kompetisaun tenke partisipa nafatin.

Nunee mós ba juri ne’ebé mak Prezidente Repúblika dignifika liuhosi atribuisaun sertifikadu ne’e, iha futuru ne’e servisu ho onestidade no neutralidade atu fó valór ba ita-nia artista sira.

Kompetisaun tinan kotuk ne’e, nia apresia ba juri sira-nia kapasidade hodi konsege deteta manan-na’in sira liu-liu manan-na’in ba premeiru lugar no segundu lugar ho onestidade.

SEAK husu ba Xefe Kaza Sivíl maske iha situasaun pandemia COVID-19 maibé ho vasinasaun ne’ebé mak iha ona no espera katak iha tinan oin Prezidente Repúblika bele realiza tan festivál arte no kultura ba foinsa’e sira.

Manan-na’in, Miucha Borja da Costa, hateten nia sente orgullu no agradese tebes tanba bele simu sertifikadu apresiasaun hosi Prezidendente Repúblika, Francisco Guterres Lú Olo.

“Liu Husi sertifikadu ne’ebé mak ha’u simu, ha’u sente kontente tanba Estadu ka Prezidensiál Repúblika fó onra ba susesu tomak ne’ebé mak ha’u hetan iha loron kompetisaun nian, no mós fó onra ba ha’u-nia esforsu iha kompetisaun ne’ebé mak hala’o ona iha tinan kotuk,” nia dehan.

Eventu festivál arte no kultura ne’e, realiza tiha ona iha Dili iha 23 to’o 27 novembru 2020 no iha 23 novembru hahú hala’o faze eliminatóriu ba múzika rezisténsia no dansa tradisionál sei diretamente ba iha faze meiu finál no finál.

Orsamentu ne’ebé koloka ba kompetisaun ida-ne’e, maihosi fatin tolu mak hanesan Prezidénsia Repúblika rasik ho montate $75.000, Sekretária Estadu Arte no Kultura $15.000 no hosi Sekretária Estadu Juventude no Desportu $10.000.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here