Primeiru-Ministru, Taur Matan Ruak no entidade relevante halo observasaun estrada konesaun Metiaut ba Kamea, sesta (23/07). Imajen/MOP

DILI, 23 jullu 2021 (TATOLI)–Primeiru-Ministru (PM), Taur Matan Ruak, akompaña hosi Ministru Obra Públiku (MOP), Salvador Eugênio Soares dos Reis Pires, no Prezidente Institutu Jestaun Ekipamentu, Institutu Públiku (IGE, I.P), Hermenegilda da Costa Laurentina, inklui entidade relevante, observa direta estrada konesaun Metiaut liga ba Kamea iha área foho leten.

Iha ámbitu observasaun, Xefe Governu hateten, estrada ne’e iha tempu Governu anteriór, Sekretaria Estadu Formasaun Profisionál no Empregu (SEFOPE) loke ona, maibé to’o de’it iha foho klaran, la konsege to’o iha foho leten, kuaze kilómetru ida resin mak sei hela.

“Estrada ne’e uluk SEFOPE loke maibé falta kilómetru ida liu, ha’u-nia hanoin ne’e imi loke liga tiha (halo konesaun estrada hosi Metiaut to’o Kemea iha foho leten,” PM Taur orienta MOP no IGE bainhira hala’o vizita ba terrenu iha suku Metiaut, postu administrativu Cristo Rei, sesta ne’e.

Iha biban ne’e, PM fó apresiasaun ba ekipa téknika MOP no IGE, ne’ebé halo servisu maka’as hodi halo mudansa, liuliu inisia loke estrada ba área rurál sira.

“Ha’u apresia imi-nia servisu, ha’u la’os dehan tanba foin sai Primeiru-Ministru ba Governu ida-ne’e mak apresia imi-nia servisu, ha’u uluk hanesan Prezidente haree ona kondisaun, tanba ne’e mak ha’u mai haree iha diferénsia ida no kontinua nafatin hanesan ne’e,” nia akresenta.

Iha fatin hanesan, Ministru Salvador, hateten, iha posibilidade halo abertura foun atu nune’e bele halo konesaun estrada ne’ebé eziste ona iha Kamea.

“Nune’e ligasaun Kamea ho Metiaut bele iha dalan korta,” nia hatutan.

Prezidente IGE no nia ekipa inklui ekipa hosi Diresaun Nasionál Estrada, Xefe Departamentu no tékniku sira haree kondisaun iha terrenu hodi koordena ho xefe suku atu hahú serbisu.

Tuir Ministru, normalmente kona-ba loke estrada foun, IGE iha prosedimentu administrativa molok ezekuta, ne’ebé presiza rekolla dadus, halo avaliasaun kustu, planu ba ekipamentu ne’ebé tenke uza, no tipu ekipamentu.

Iha biban hanesan, Prezidente IGE, dehan, parte institutu sei mai fali terrenu hodi rekolla dadus molok mobiliza ekipamentu pezadu.

“Ha’u hanoin ohin ekipa hosi obra públika no ekipa IGE haree ona kondisaun no ami mós rona orientasaun hosi Primeiru-Ministru no Ministru, ne’ebé iha posibilidade tempu badak ekipa sei foti dadus hafoin ita hatene liuhosi relatóriu survey,” nia tenik.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here