Enkarregadu Negósiu hosi Santa Sé, Monseñor Marco Sprizzi. Imajen TATOLI/Francisco Sony

DILI, 23 jullu 2021 (TATOLI)–Enkarregadu Negósiu hosi Santa Sé, Monseñor Marco Sprizzi, hasoru malu ho Primeiru-Ministru (PM), Taur Matan Ruak, hodi hato’o mensajen Papa Francisco, ne’ebé enkoraja povu timor-oan simu vasina kontra COVID-19.

“Amo Papa hato’o mensajen ne’ebé lori mós ba Prezidente Repúblika iha ha’u-nia vizita antes. Amo Papa komfirma katak nia iha intensaun no vontade tomak bainhira implementasaun vasina kontra pandemia COVID-19, nia bele vizita Timor-Leste iha fulan dahuluk iha tinan 2022,” Monseñor Marco Sprizzi, hateten hafoin hasoru Xefe Governu iha Rezidénsia Farol, sesta ne’e.

Timor-Leste antes ne’e halo ona preparasaun programa vizita Santo Padre hahú tinan anteriór.

Notísia relevante: Papa Francisco iha vontade atu mai Timor-Leste

Aleinde ne’e, Enkarregadu Negósiu partilla mós mensajen Santo Padre nian ligadu ho aprovasaun Lei Migrasaun no Azilu Timor-Leste, ne’ebé fó vantajen ba misionáriu sira ne’ebé haknaar-an iha Timór hodi serví povu timor-oan.

“Santo Padre agradese ba Governu Timor-Leste ligadu ho aprovasaun lei ne’ebé permite misionáriu sira iha Timor-Leste to’o tinan lima hodi presta servisu ba povu timor-oan,” nia akresenta.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here