Primeira sekretária Ministériu Negósiu Estranjeiru Austrália, Wanda Sendzimir, hamutuk ho Diretór Jerál Serbisu Migrasaun, entrega sertifikadu internasionál ba ofisiál Serbisu Migrasaun, Inspetór Polísia, Gonçalo António Pinheiro ho Primeiru Sarjentu Genoveva Morreira R. Lopes, ne’ebé remata ona sira-nia kursu hosi Royal Melbourne Institute of Technology (RMIT). Imajen Média MI.

DILI, 23 jullu 2021 (TATOLI)—Primeira sekretária Ministériu Negósiu Estranjeiru Austrália, Wanda Sendzimir, hamutuk ho Diretór Jerál Serbisu Migrasaun, entrega sertifikadu internasionál ba ofisiál Serbisu Migrasaun na’in-rua hanesan, Inspetór Polísia, Gonçalo António Pinheiro ho Primeiru Sarjentu Genoveva Morreira R. Lopes, ne’ebé remata ona sira-nia kursu hosi Royal Melbourne Institute of Technology (RMIT).

RMIT halo parseria ho Ministériu Seguransa Públiku Vietname no Ministériu Negósiu Estranjeiru Austrália hodi suporta preparasaun hasoru pandemia iha Sudeste Aziátiku tomak, liu hosi kursu ne’ebé hala’o liuhosi vídeo virtuál ba ofisiál kontrolu fronteira-sira.

Notísia relevante:MI-IOM deskuti sistema informasaun atu apoia Serbisu Migrasaun

Diretór Jerál Serbisu Migrasaun, Luis Soares Barreto, hateten apoiu hosi kooperasaun entre Timor-Leste no Austrália no Vietname ne’e, hodi mellora di’ak liután Serbisu Migrasaun nian iha jestaun fronteira.

“Programa ne’e hetan apoiu makás hosi Governu Austrália liuhosi Ministériu Negósiu Estranjeiru Austrália nian iha Embaixada-sira ne’ebé estabelese no mós Ministériu Seguransa Públika Vietname nian, nune’e nasaun parseria-sira ne’e hakarak atu halo formasaun hodi eleva kapasidade ita-nia membru Serbisu Migrasaun-sira,” Luis Barreto, hateten liuhosi komunikadu ne’ebé Agência Tatoli asesu, sesta ne’e.

Sertifikadu ne’e hanesan rekoñesimentu ba padraun jestaun no kualidade ne’ebé membru na’in-rua tuir ona kursu durante semana haat nia laran, hahú hosi 4 maiu to’o 10 jullu tinan ne’e.

Formasaun ne’e totál partisipante hamutuk ema 53 no nasaun-sira ne’ebé hola parte iha programa ne’e mak Brunei, Cambodia, Indonézia, Laos, Malasia, Filipina, Singapura, Tailándia, Vietname, Austrália no Timor-Leste.

Iha tema prinsipál haat no kada modul okupa semana ida ne’ebé  kobre dezafiu ne’ebé enfrenta hosi membru migrasaun, prátika ne’ebé di’ak durante COVID-19, reabertura fronteira no preparasaun hasoru pandemia ne’ebé foka liu ba haforsa kapasidade hodi hametin ligasaun ho parte interesada sira-seluk.

Sei hadi’a kualidade membru Serbisu Migrasaun nian iha jestaun fronteira, tanba ida ne’e, esensiál tebes hodi detekta no prevene sasan ne’ebé tama ilegál, tráfiku umanu no krime transnasionál.

Formadu Inspetór Polísia, Gonçalo António Pinheiro, agradese ba apoiu hosi Governu Austrália liu hosi nia embaixada iha TL no parseriu dezenvolvimentu-sira ne’ebé ho laran tomak, hakarak kontribui no apoiu progresu dezenvolvimentu Migrasaun nian iha futuru.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here