Primeriu-Ministru, Taur Matan Ruak, konvoka enkontru ho eis Embaixadora Korea Súl, Adalgisa Ximenes, iha Rezidénsia Farol, sesta (23/07). Imajen TATOLI/Francisco Sony

DILI, 23 jullu 2021 (TATOLI)—Mandatu Embaixadora Timor-Leste ba Korea Súl, Adalgisa Ximenes, ramata ona iha fulan-abríl tinan ne’e, nune’e nia parte hasoru malu ho Primeiru-Ministru (PM), Taur Matan Ruak, hodi hato’o agradesementu ba konfiansa Governu.

“Hanesan sidadaun prontu koopera nafatin ho Governu maibé kooperasaun hotu tenke liuhosi Governu no kooperasaun sira ne’e institusionál, hosii Governu ho Governu maka sei nafatin kontinua,” Adalgisa Ximenes hateten hafoin ramata reuniaun iha Rezidénsia Farol, sesta ne’e.

Eis Embaixadora Korea Súl, Adalgisa Ximenes. Imajen TATOLI/Francisco Sony

Durante mandatu, Embaixadora ne’e kontinua servisu kooperasaun bilaterál hamutuk 12 entre nasaun rua ne’e.

“Ha’u kontinua de’it programa ne’ebé ita-nia Governu hahú ona desde tinan 2010, hanesan haruka traballadór sira ba serbisu iha Korea no seluk tan. Nu’udar Embaixadora, iha funsaun atu halo mós akompañamentu ba estudante timor-oan sira ne’ebé halo estudu iha Korea Súl maski sira la’ós hetan bolsa hosi Governu timor-oan, maibé hetan bolsa hosi Governu koreanu, tanba ne’e nu’udar reprezentante Estadu iha obrigasaun tau-matan ba sira,” nia hatutan.

Aleinde ne’e, hanesan reprezentante Estadu Timor-Leste halo mós promosaun kona-ba mina, kafé no produtu lokál seluk tan.

“Ha’u sente iha responsabilidade atu reprezenta Timór iha nasaun seluk, ne’e todan ida iha kabas tanba tenke nafatin hatudu Timór nia imajen iha Korea no nasaun seluk, tanba iha ne’ebá iha Embaixada nasaun seluk nian ne’ebé introdúz mós Timór ba nasaun sira seluk,” Embaixadora subliña.

Jornalista : Antónia Gusmão

Editora     : Julia Chatarina  

HAKEREK NO HATÁN

Please enter your comment!
Please enter your name here