Logotipu CAC.

DILI, 23 jullu 2021 (TATOLI)—Tribunál Distritál Dili (TDD), kontinua hala’o audiénsia julgamentu hodi rona sasin nu’udár investigadór hosi Komisaun Anti Korrupsaun (CAC sígla portugés), ba kazu ne’ebé envolve arguida deputada Maria Anabela Sávio.

TDD notifika arguida ho nia motorista, tanba deskonfia prátika krime pekulatu ka enxe señas kombustível ho kupon Estadu ba karreta privadu.

Notísia relevante:TDD julga “deputada” Anabela Sávio

Investigadór CAC, ho inisiál DL, hateten iha loron 09 fulan abríl 2019, iha tuku 17:40 otl ba iha abastesimentu Lafaek Comoro, atu enxe mina ba motór no bainhira to’o iha fatin haree deputada-nia motorista enxe hela mina ba karreta ho marka privadu utiliza kupon Estadu, nune’e diretamente husu ba motorista atu hatudu prova autorizasaun ka karta ruma, maibé momentu ne’ebá motorista kontaktu direta ba deputada Anabela hodi justifika.

Nia dehan, hein iha fatin atu tékniku sira lori karta autorizasaun no karta justifikasaun, maibé kuaze oras serbisu liu ona, parte tékniku hosi Parlamentu Nasionál (PN) ba hasoru CAC, informa hela katak iha loron  tuir-mai mak bele lori karta autorizasaun tanba edifísiu taka ona.

Ho ida ne’e deside atu muda ba iha loron 10 abríl 2019 tuku 8:30 otl, maibé tekniku sira hasoru CAC iha tuku 09:00, hodi fo karta justifikasaun, katak utilizasaun kupon ne’e ho razaun atu ba halo serbisu iha munisípiu Lautém, tanba karreta deputada-nian ho marka 8837 avaria, no presiza halo manutensaun.

“Momentu ne’ebá ami mós buka hatene-tuir karreta ne’ebé avaria lori ba iha ofisina ida ne’ebé, maibé tékniku sira hatudu de’it karta autorizasaun no karta justifikasaun, ne’ebé la uza karimbu ofisiál PN,” sasin ne’e hateten iha sala audénsia TDD, Mandarin, sesta ne’e.

Tanba ne’e, nia deskonfia nafatin  bainhira  CAC identifika maka sira urjentemente halo iha loron hafoin akontese irregularidade.

Atu hetan prova loloos, investigadór ne’e ho ekipa, tun direta ba iha lojístika no ofisina PN nian, hodi verifika karreta ne’e halo duni manutensaun ka la’e, maibé  bainhira to’o iha fatin laiha karreta ida mak para iha ne’eba, nune’e CAC bolu direta tékniku no mekániku PN nian ne’ebé fó informasaun katak, foin simu relatóriu atu halo manutensaun ba karreta.

Nune’e, ekipa CAC orienta kedan tékniku lojístika hodi telefone  funsionáriu ne’ebé apoiu viazen munisípiu hamutuk ho deputada ba halo fiskalizasaun, maibé pasa fali informasaun katak, daudaun-ne’e halo ona viajen ba Lautém ho karreta  prado marka 8837 no  la’ós karreta privadu.

“Haree ba ida-ne’e CAC konsidera mosu irregularidade iha tékniku PN, hanesan motorista utiliza kupon Estadu ba enxe mina iha karreta privadu ho númeru seri la hanesan ho númeru seri ne’ebé justifika iha dokumentu justifikasaun no laiha karimbu ofisiál  hosi PN,’’ nia dehan.

Rona tiha deklarasaun ne’e, Tribunál deside adia julgamentu ba 30 jullu hodi rona leitura desizaun.

Prosesu audiénsia ne’e prezide hosi Juis, José Gonçalves, Ministériu Públiku reprezenta prokuradór Rogério Viegas no arguido-sira hetan asisténsia legál hosi advogadu privadu, Arlindo Sanches.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here