Administradór Hospital Referénsia Oé-Cusse, Manuel da Cunha. Imajen Tatoli/Abilio Elo Nini.

OÉ-CUSSE, 23 Jullu 2021 (TATOLI)—Hospitál Referénsia Rejiaun Administrativa Espesiál Oé-Cusse (RAEOA) hosi fulan jeneiru-jullu 2021 rejista bebé sofre moras Rinofaringitis-Akut (RFA) hamutuk na’in-333

“Durante fulan hitu (7) Hospital Referál Oé-Cusse ita rejista moras 10, espesiál ba labarik idade tinan lima (5) mai kraik iha tipu oin rua (2). Primeiru mak internamentu rawat jalan ninian no emerjénsia ka rawat tinggal ne’e konsege rejista kazu aas liu mak bebe moras Rinofaringgitis-Akut hamutuk 333 mak baixa hela,” Administradór Hospitál Referénsia Oé-Cusse, Manuel da Cunha, informa ba Agência Tatoli iha nia servisu fatin, suku Costa, sub-rejiaun Pante Makasar, sesta ne’e.

Kauza hosi moras Rinofaringitis-Akut ne’e, tanba moras kleur iha uma no laiha atensaun hosi parte inan-aman atu ba konsulta, nune’e akontese moras króniku ona mak foin refere mai konsulta iha óspitál entaun kazu ne’e aas iha Hospitál Referénsia RAEOA.

Kauza seluk, sintomás ba moras Rinofaringgitis-Akut ne’e mak primeiru isin-manas, me’ar, inus metin, fani no moras garganta inklui hada’et liuhosi anin.

Aleinde moras Rinofaringgitis-Akut, Hospitál Referál Oé-Cusse rejista mós moras Infesaun Respiratoriu Aguda (IRA) hamutuk bebé na’in-331 inklui moras diarea rejista hamutuk bebé na’in-122.

Kauza hosi moras IRA ne’e akontese anin hamosu rai-rahun, entaun dalaruma labarik sira halimar rai-rahun, nune’e bele akontese fani no me’ar. 

Nune’e mós kauza hosi moras diarea ne’e akontese sempre iha fulan janeiru tanba lalar barak, han la fase liman, han hamutuk ho animál entaun bele akontese moras ne’e.

Moras seluk ne’ebé óspitál rejista hosi bebé tinan lima (5) mai kraik mak hanesan moras Sindromes Febris Agudas (SFA) rejista na’in-165, moras bronchitis rejista na’in-80, moras Piodermitis rejista na’in-74, moras Dermatitis rejista na’in-29, moras Pityriasis Versicolor rejista na’in-27, moras Parasit rejista na’in-24, no ikus liu mak moras Scabiosis rejista bebé na’in-ualu (8).

Enkuanto kona-ba pediatria internamentu nian rejista moras aas-liuhosi bebe tinan lima (5) mai kraik mak moras anemia na’in-36, Dengue Con Signo de Alarma na’in-35, Bronchopneomonia na’’in-13, Diarea na’’in-12, TBC na’in-sia (9), Intoxication na’in-sia (9), Infesaun Respiratoriu Aguda (IRA) na’in-ualu (8), Sindroma Febris Aguda (SFA) na’in-hitu (7), Meningo Encephelitis na’in-lima (5).

Administradór Hospitál Referál Oé-Cusse garantia katak fasilidade ba ekipamentu saúde no medikamentu laiha problema. Maske iha situasaun COVID-19 fó impkatu tebes mai iha RAEOA, maibé óspitál iha koordenasaun di’ak ho SAMES nasionál, nune’e la implika ba estoke aimoruk iha Oé-Cusse.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here