Vise-Ministru Agrikultura no Peskas (MAP), Abílio Xavier de Araújo, halo diálogu komunitáriu iha aldeia Soikili, sesta (23/07). Imajen TATOLI/Natalino Belo

LAUTÉM, 23 jullu 2021 (TATOLI)–Vise-Ministru Agrikultura no Peskas (MAP), Abílio Xavier de Araújo, planeia dezenvolve reflorestasaun tanba nota katak munisípiu Lautém iha potensialidade.

“Nai Xefe suku, ami husu rai balun iha kada suku, hodi parte ministériu bele halo to’os ezemplár, tanba Governu planu dezenvolve reflorestasaun, kuda ai-oan sira ne’ebé importa hosi rai-li’ur,” Vise-Ministru hateten durante diálogu komunitáriu liuhosi programa ‘Naroman ba Suku, iha aldeia Soikili, suku Parlamentu, postu administrativu Lautém, munisípiu Lautém, sesta ne’e.

Notísia relevante: Diálogu komunitáriu iha suku Euquise, membru Governu husu prepara proposta

Governante ne’e nota mós katak iha Lautém, liuliu iha parte Tutuala nakonu ho ai-horis ne’ebé naturál sein estragu hosi ema.

“Ai-horis parte ida hosi ema-nia moris tanba sai hanesan abrigu, tanba ne’e, povu Lautém kontinua mantein hadomi ai-horis ne’ebé Maromak fó. Tenki kuida no hadomi ai-horis sira,” nia akresenta.

Nia konsidera, Timor-Leste presiza aumenta tan ai-horis ne’ebé iha valór ekonómiku hodi hasa’e rendimentu ekonomia povu iha baze.

Tuir governante ne’e, MAP hanesan ministeiru tékniku ne’ebé hatutan mos programa ‘Naroman ba Suku, nune’e presiza dezenvolve área agrikultór iha Timor-Leste liuhosi fornese bee atu kuda produtu agríkola, fasilita ekipamentu agrikultura ba povu atu hasa’e produsaun, nune’e bele hamenus importasaun hahán.

“MAP prontu atu hamrik servisu ho povu iha momentu ne’ebé de’it dezenvolve setór agrikultura,” nia hatutan.

MAP liuhosi Diresaun Nasionál Floresta no Jestaun Bázika Idrográfika, kada tinan sempre prodús ai-oan milliaun ida no fahe gratuita ba komunidade ne’ebé presiza atu kuda.

Diresaun ne’e prodús ai-oan iha sentru viveiru permanente iha postu administrativu Maubara, munsípiu Lautém, Viqueque, Manufahi no iha sentru komunitáriu hamutuk 40 iha munisípiu 12.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here