Embaixadór Timor-Leste iha Kuba, Eusébio Corsino de Araújo. Imajen TATOLI/Francisco Sony

DILI, 23 jullu 2021 (TATOLI)–Embaixadór Timor-Leste iha Kuba, Eusébio Corsino de Araújo kompromete sei komunika ho Governu kubanu hodi reativa programa alfabetizasaun, tanba programa ne’e hahú ona iha tinan 2008 maibé ramata ona iha tinan 2015.

“Programa alfabetizasaun hala’o ona faze dahuluk no hela faze daruak, iha ne’e atu halo edukasaun ba adultu atu iha kontinuidade, maibé alfabetizasaun ba adultu ne’e tenke prepara filafali formadór,” Embaixadór Eusébio hateten hafoin reuniaun ho Primeiru-Ministru, Taur Matan Ruak, iha Rezidénsia ofisiál Farol, sesta ne’e.

Tanba ne’e, nia sei koordena filafali ho Governu kubanu hodi haruka sira-nia ema hodi fó formasaun ba adultu sira, nune’e fó tutan ba hirak ne’ebé presiza.

“Programa ne’e prioridade ida ba ita-nia rain tanba alfabetizmu hanesan obskurantizmu ida, tanba ne’e atu sai hosi situasaun ne’e presiza prepara povu, ne’e duni tenke fó prioridade. Tanba ne’e, Governu liuhosi Ministériu Edukasaun, Juventude no Desportu mak deside bainhira bele realiza hikas programa,” nia akresenta.

Antes ne’e, iha ámbitu pose, Prezidente Repúblika, Francisco Guterres ‘Lú Olo’, hato’o mensajen ba reprezentante Estadu ne’e katak, tuir rezultadu sensu uma-kain tinan 2015, iha populasaun 253.000 ho idade liu 15 mak analfabetu ka ho nível literasia kiik, ne’ebé ema hirak ne’e la hatene ka ladún hatene hakerek no lee.

“Karik ita husik de’it hanesan ne’e, ita tama iha risku tanba iha populasaun ho idade ativa maibé tanba la eskola natón sei fó impaktu negativu ba família, atividade ekonómika inklui dezenvolvimentu sosiál,” Xefe Estadu dehan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here