Primeriu-Ministru, Taur Matan Ruak, konvoka enkontru ho Embaixadór EUA iha Timor-Leste, Kevin Blackstone, iha Rezidénsia Farol, sexta (23/07). Imajen TATOLI/Francisco Sony

DILI, 23 jullu 2021 (TATOLI)—Embaixadór Estadu Unidu Amérika (EUA) ba Timor-Leste, Kevin Blackstone, hasoru malu ho Primeiru-Ministru (PM), Taur Matan Ruak, hodi diskute kona-ba dezenvolvimentu setór aviasaun sivil no militár.

“Estadu Unidu Amerika hakarak sai parte lidera apoia iha parte aviasaun sivil no militár, hanesan mós Austrália ne’ebé lidera apoiu Timor-Leste ba komponente navál,” Embaixadór Kevin Blackstone hateten hafoin reuniaun ho Xefe Governu iha Rezidénsia Farol, sesta ne’e.

Primeriu-Ministru, Taur Matan Ruak, konvoka enkontru ho Embaixadór EUA iha Timor-Leste, Kevin Blackstone, iha Rezidénsia Farol, sexta (23/07). Imajen TATOLI/Francisco Sony

Nune’e, Diplomata ne’e husu Governu atu define prioridade sira, hafoin hato’o atubele hetan apoiu no asisténsia téknika hosi Aviasaun Sivil Federál no Alfándega EUA.

Aleinde ne’e, EUA mós hakarak apoia Timor-Leste iha parte protesaun sivil.

“Ha’u fó hatene ba Primeiru-Ministru katak apoiu seluk sei fó ba ajénsia protesaun Sivíl atu konstrui sentru atendimentu emérjensia ho fundu millaun $1,” nia akresenta.

Notísia relevante: Timor-Leste no EUA lansa fatuk dahuluk konstrusaun konjunta Aeródromu Baucau

Iha enkontru, parte rua diskute kona-ba kooperasaun reabilitasaun konjuta ba Aeródromu Baucau no inklui fasilidade sira.

Embaixadór EUA iha Timor-Leste, Kevin Blackstone. Imajen TATOLI/Francisco Sony

“Ami apoiu iha área seguransa, asisténsia umanitária no operasaun ba dezastre naturál hodi kontribui ba dezenvolvimentu ekonomia reziliente no diversifikada,” nia tenik.

Nune’e mós, kapasidade armazenamentu  inklui doasaun aviasaun Cessna 206 ida fábrika iha EUA, instalasaun barreira  (lutu) seguransa, konstrusaun armazen ba ekipamentu hanesan karreta tula kombustível, karreta bombeiru, forklift, kamioneta rua Ford F-250, karreta hamoos pista no veíkulu inklui apoiu seluk ba seguransa ekipamentu aeroportu.

“Ita iha mós projetu seluk iha komponente parte sivíl no seguransa, hanesan atu apoiu aviaun ba FALINTIL-Forsa Defeza Timor-Leste (F-FDTL) ho objetivu atu halo patrullamentu iha tasi Timór atubele deteta peska ilegál sira,” nia hatutan.

EUA mós sei apoiu natureza sivíl hodi fornese luminária ba aeroportu iha Baucau no Dili.

Projetu ne’e, finansia hosi Ministériu Defeza no EUA aloka orsamentu millaun $10,6 hodi hadi’a kapasidade Timor-Leste iha área seguransa, asisténsia umanitária no operasaun ba dezastre naturál.

 Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here