Primeriu-Ministru, Taur Matan Ruak, konvoka enkontru ho Embaixadór dezignadu, iha Rezidénsia ofisiál Farol, sesta (23/07). Imajen TATOLI/Francisco Sony

DILI, 23 jullu 2021 (TATOLI)–Embaixadór dezignadu na’in-lima hasoru malu ho Primeiru-Ministru (PM), Taur Matan Ruak, molok desloka rai-li’ur hala’o misaun Estadu.

Embaixadór Timor-Leste ba ONU, Carlito Nunes. Imajen TATOLI/Francisco Sony

“Ami Embaixadór na’in-lima ne’ebé semana kotuk simu pose hosi Prezidente Repúblika, hanesan reprezentante nasaun hodi hala’o knaar iha nasaun seluk. Ami mai hasoru Primeiru-Ministru molok desloka ba nasaun iha loron 06 agostu, hanesan Embaixadór saida mak bele halo iha rai-li’ur no bele promove nasaun ne’ebé ami sei ba,” Embaixadór Timor-Leste ba Organizaun Nasaun Unida (ONU), Carlito Nunes, hateten hafoin hasoru Xefe Governu iha Rezidénsia ofisiál Farol, sesta ne’e.

Embaixadór dezignadu dada lia ho mídia nasionál hafoin hasoru malu ho Primeriu-Ministru, Taur Matan Ruak, iha Rezidénsia ofisiál Farol, sesta (23/07). Imajen TATOLI/Francisco Sony

Iha hasoru malu ne’e, Embaixadór sira simu orientasaun kona-ba polítika externa ein jerál.

“Hanesan reprezentante nasaun, kuandu iha desizaun ka negosiasaun ruma sempre iha konsertasaun polítika rai-laran molok ami foti desizaun ruma iha misaun ne’ebé ami hala’o,” nia subliña.

Reprezentante Estadu Timor-Leste iha nasaun lima ne’e simu pose hosi Prezidente Repúblika, Francisco Guteres ‘Lú Olo’ iha loron 13 jullu 2021.

Notísia relevante: Prezidente Repúblika fó pose ba embaixadór dezignadu sira

Embaixadór dezignadu na’in-lima ne’e kompostu hosi Embaixadór Timor-Leste ba ONU, Carlito Nunes, Embaixadora ba Nova Zelándia, Felicidade de Sousa Guterres, Embaixadór ba Brunei Darussalam, Abel Guterres, Embaixadór ba Kuba, Eusébio Corsino de Araújo no enviadu espesiál ho kategoria Embaixadór Itinerante Timor-Leste ba asuntu klimátiku, Adão Soares Barbosa.

Maski nune’e, Embaixadór haat mak hasoru malu ho PM, enkuantu Embaixadór Abel Guterres desloka ona ba Brunei Darussalam.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here