Primeriu-Ministru, Taur Matan Ruak, konvoka enkontru ho AHDMTL, iha Rezidénsia Faról, sesta (23/07). Imajen TATOLI/Francisco Sony

DILI, 23 jullu 2021 (TATOLI)—Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hamutuk ho ekipa hasoru malu ho Primeiru-Ministru (PM), Taur Matan Ruak, hodi hato’o dezafiu ne’ebé sira hasoru liga ho prevensaun no mitigasaun COVID-19.

Diretór Ezekutivu AHDMTL, Gaspar Afonso. Imajen TATOLI/Francisco Sony

Asosiasaun ne’e husu ba Ministériu Saúde (MS) no Sala Situasaun, Sentru Integradu Jestaun Krize (CIGC, sigla portugés) atu fó atendimentu di’ak ba sira bainhira infetadu COVID-19 tanba sira sente diskriminadu iha atendimentu bainhira infetadu COVID-19.

“Ami fó hanoin ba Primeiru-Ministru ne’ebé lidera Sala Situasaun, karik ema ho defisiénsia infetadu COVID-19, parte relevante sira bele fó atendimentu imediatamente tanba situasaun antes ne’e ami hetan diskriminasaun bainhira ami infetadu, tanba ne’e hanesan sidadaun fó hanoin ba Xefe ezekutivu,” Diretór Ezekutivu AHDMTL, relata, hafoin ramata reuniaun ho PM iha Palásiu Governu, sesta ne’e.

Nia dehan, ema ho defisiénsia prepara-an bainhira mosu variante foun COVID-19, tanba ne’e husu parte relevante kolabora ho di’ak.

Primeriu-Ministru, Taur Matan Ruak, konvoka enkontru ho AHDMTL, iha Rezidénsia Faról, sesta (23/07). Imajen TATOLI/Francisco Sony

“COVID-19 ne’e fó risku no hamate lalais ema, maibé kuandu ami pozitivu lafó atendimentu, ida-ne’e maka ami mai fó hanoin la’ós mai keixa tanba ami-nia meiu advokásia mak hanesan ne’e ona, ami tenke fanun nafatin se ami la fanun ema abandona tiha ami, tanba agora ema ho defisiénsia iha Timor-Leste hamutuk 38.118 no ami-nia direitu ne’e konsagra iha Konstituisaun artigu 21 no artigu 16 mós iha alinea 2, ne’ebé hatuur katak la haree ba rasa, kor, étniku, fíziku no mentál, entaun ami mós hakarak hambrik hodi hato’o ami-nia lian,” nia akresenta.

Diretór Ezekutivu AHDMTL, hato’o kestaun ne’e tanba antes ne’e ema ho difisiénsia matan na’in-ualu bainhira infetadu COVID-19, la hetan atendimentu hosi MS no bainhira rekupera mak foin pesoál saúde sira ba vizita no atribui karta livre.

“Primeiru-Ministru rekoñese katak durante ne’e ami hetan diskriminasaun iha atendimentu no nia husu deskulpa. Primeiru-Ministru louva ami-nia inisiativa tanba ami vasina hotu ona, balun kompleta ona no balun besik kompleta. Atu dehan, maski ami-nia kondisaun hanesan ema ho defisiénsia, maibé ami obedese,” nia subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here