Eskola EBF 1,2 Soikili, suku Parlamentu, Imajen TATOLI/Natalino Belo

LAUTÉM, 23 jullu 2021 (TATOLI)–Koordenadór Eskola Ensinu Báziku Filiál (EBF) siklui 1 no 2 Sentrál Com, iha aldeia Soikili, suku Parlamentu, postu admistrativu Lautém, munisípiu Lautém, João Hornai, hateten, eskola hasoru difikuldade tanba sala aula la to’o atu akumula alunu sira, nune’e implika ba prosesu aprendizajen.

Sala aula iha Eskola EBF 1,2 Soikili, suku Parlamentu, Imajen TATOLI/Natalino Belo

“Ami hasoru difikuldade iha sala aula, tanba sala ida fahe ba rua, entaun bainhira iha aula iha tempu hanesan, profesór iha aula rua ne’e rona malu, nune’e implika ba kaptasaun alunu atu simu matéria ne’ebé profesór sira fó,” Koordenadór Eskola informa ba Agência TATOLI, iha aldeia Soikili, sesta ne’e.

Tuir Responsável Eskola ne’e, difikuldade seluk mak menus profesór inklui asesu ba liña eletrisidade no telefone, nune’e difikulta atu halo dadus no relatóriu kada fulan.

“Profesór foin na’in-lima inklui ha’u mós direitamente halo observasaun, entaun sala balun profesór la to’o, seluk mak atu arkiva dadus hosi alunu iha komputadór ladi’ak tanba laiha eletrisidade no rede telefónika no atu halo relatóriu fulan tenke la’o dook,” nia akresenta.

Alunu sira iha Eskola EBF 1,2 Soikili, suku Parlamentu, Imajen TATOLI/Natalino Belo

Maski nune’e, João dehan, alunu hamutuk 101 iha eskola ne’e iha vontade atu tuir prosesu aprendizajen maski kondisaun eskola ladun favorável.

Ba kestaun ne’e, Diretór Eskola ne’e halo ona esforsu hodi elabora proposta dala-haat ona hodi submete ba servisu edukasaun munisípal inklui inspektór eskolár, maibé to’o ohin loron seidauk iha rezultadu.

Durante ne’e, inan-aman hosi alunu mak iha konsiénsia tanba sente katak edukasaun importante ba oan nia futuru, ikus mai kolabora ho profesór EBF Soikili hodi hadi’a infraestrutura eskola hanesan konstrui moru eskola no dapur.

“Halo lutu eskola hosi ami-nia esforsu rasik inklui bainhira kalen a’at, ami hamutuk ho inan-aman mak troka, enkuantu hosi parte Governu seidauk mai ajuda. Ami kaer prinsípiu badinas no rona malu,” nia hatutan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here