COVALIMA, 23 jullu 2021 (TATOLI) – Diresaun Nasional Transporte no Terrestre (DNTT) realiza workshop ba kandidatu ne’ebé trata karta kondusaun veíkulu no motorizada.
“Workshop ne’e ho baze orientasaun atu motorista sira tenke disiplina utiliza dalan públiku hodi prevene asidente tráfegu,” Diretór DNTT Natalino do Rosário, hateten iha nia nia diskursu iha ámbitu workshop ne’ebé hala’o iha Salaun Administrasaun Covalima, sesta ne’e.
Natalino mós esplika, dadus ne’ebé DNTT asesu hosi Tránzitu Nasionál katak maioria asidente ne’ebé akontese iha estrada públiku 90% mai hosi ema tanba kondús karreta ka motór ho velosidade, lanu no seluk tan.
Iha sorin seluk, Komandante Polísia Departamentu Nasionál Tránzitu no Seguransa Rodoviária Polísia Nasionál Timor-Leste (PNTL), Superintendente João Belo dos Reis, hateten workshops ne’e hanesan oportunidade hodi sensibiliza motorista sira oinsá maka uza regra sira iha estrada públiku hodi evita asidente tráfegu.
Jornalista : Celestina Teles
Editór : Francisco Simões