Diretór Autoridade Aduaneiru Rejiaun Administrativa Espesiál Oé-Cusse Ambeno (RAEOA), José da Costa. Imajen Tatoli/Abilio Elo Nini.

OÉ-CUSSE, 23 Jullu 2021 (TATOLI)—Diretór Autoridade Aduaneira Rejiaun Administrativa Espesiál Oé-Cusse Ambeno (RAEOA), José da Costa, informa kada semana servisu autoridade Aduaneira Oé-Cusse autoriza importa ba sasán nesesidade báziku no materiál kontrusaun.

Nia hateten, Guvernu liuhosi Ministériu Defeza nia polítika mak fó autorizasaun katak importasaun bele maibé persiza kontrolu maka’as hosi servisu saúde. Durante importasaun sasán tama mai no bainhira to’o iha RAEOA ne’e, aduaneira tenke akompaña hetan dezinfetan hosi saúde.

“Kada semana, iha loron kuarta, automatikamente karreta sira tama mai ona ho sasán ne’ebé autoriza mak nesesidade báziku no materiál kontrusaun,” José da Costa informa ba Agência Tatoli iha nia servisu fatin Palaban, suku Costa, sub-rejiaun Pante Makasar, sesta ne’e.

Iha Oé-Cusse, Governu fó autorizasaun hosi odamatan ida de’it liu hosi fronteira Sakato-Wini, tanba tuir protokolu saúde sira atu hetan akompaña tanba Oé-Cusse tenke livre hosi moras ne’e, tanba ne’e mak taka fronteira Oésilo, Pasabe no Citrana laiha movimentu tama-sai.

“Guvernu taka provizoriu bainhira situasaun COVID-19 la’o normál mak foin ativa fali, maibé ba fronteira Sakato ne’e Ministériu Defeza mak fó autorizasaun,” nia haktuir.

Entretantu totál funsionáriu Autoridade Aduaneira RAEOA hamutuk 43, kompostu hosi funsionáriu permanente na’in-sia (9) no kontratadu na’in-34.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here