Responsável tékniku bee moos, postu administrativu Uatulari, Agustino de Jesus. Imajen Tatoli/Vitorino Lopes da Costa.

VIQUEQUE, 23 jullu 2021 (TATOLI)—To’o oras-ne’e abitante 2.000-resin iha postu adiministrativu Uatulari, munisípiu Viqueque, asesu ona bee moos.

“Distribuisaun bee moos ba komunidade suku neen, ho nia populasaun 2.000-resin, inklui Igreja, Sentru Saúde, Polísia Nasionál Timor-Leste (PNTL) no eskola-sira,” Responsável tékniku bee moos postu administrativu Uatulari, Agustino de Jesus hateten ba jornalista Agência Tatoli, iha suku Matahoi, sesta ne’e.

Notísia relevante:Bombeiru Viqueque presija kombustível

Durante ne’e ekipa ténkiku enfrenta dezafiu barak tanba laiha transporte atu bele la’o to’o bee matan iha fatin ida naran Edimumu ho distánsia kilómetru tolu.

“Ha’u serbisu voluntáriu durante tinan 11 laiha saláriu no ha’u nia kolega ida mós voluntáriu tinan rua ona. Ha’u husu Governu liuliu parte Bee Timor-Leste Empreza Públika (BTL,E.P) atu konsidera situasaun ne’e,” Agustino hateten.

Dala barak mós tékniku ne’e tenke uza osan rasik hodi hola sasán atu hadi’a kanalizasaun bee moos ba komunidade.

Iha fatin seluk, administradór postu administrativu Uatulari, Tomas Soares da Silva, haktuir uluk iha funsionáriu ne’ebé destakadu hodi tau matan ba kanalizasaun bee moos ne’e, maibé ema ne’e ba serbisu fali iha Viqueque no agora tékniku sira serbisu voluntáriu iha ema na’in-rua.

“Ha’u mós rekoñese tékniku ne’e serbisu voluntáriu de’it. Kona-bá bee moos, populasaun Uatulari barak mak to’o oin loron seidauk asesu. Tanba ne’e, Governu presiza haree ba kestaun ne’e,” Tomas Soares da Silva hateten.

Populasaun hosi postu administrativu Uatulari,  suku Afaloicai iha na’in 4.206, Babulo na’in 2.337, Macadique na’in 5.729, Matahoi na’in 4.823, Uaitame na’in 1.422 no Vessoru na’in 1.623 ho totál 20.140.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here