Bandeira Xina. Imajen/Espesiál

DILI, 22 jullu 2021 (TATOLI)-Governu Timor-Leste hato’o solidaridade ba Governu no povu Repúblika Populár Xina ne’ebé hasoru dezastre naturál hodi rezulta estragu boot no vítima mortál.

“Iha momentu difísil, ami-nia pensamentu hamutuk ho vítima no sira-nia família, ami louva sira ne’ebé maka kontinua ho fiar-an hodi buka sobrevivente sira,” Portavóz Governu no Ministru Prezidénsia Konsellu Ministru, Fidelis Manue Leite Magalhães, hateten, liuhosi nota ne’ebé Agência TATOLI asesu, kinta ne’e.

Tuir autoridade lokál, udan iha loron hirak ikus iha rejiaun Xina hanesan udan forte liu iha tinan rihun ikus.

Pelumenus ema na’in-25 mate no na’in-hitu maka lakon iha kapitál provínsia, Zhengzhou, besik kilómetru 700 ba sudeste Pekín.

Tuir estimasaun, ema besik millaun ida mak afetatadu ba dezastre naturál ne’e no besik ema 200.000 mak evakua ona ba abrigu sira.

Udan boot ne’e halo bee sa’e ba sistema metro sidade nian, estraga estrada, veíkulu, uma no ospitál balun nakonu ho bee no laiha eletrisidade.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here