Komandante Unidade Patrullamentu Fronteira (UPF), Superintendente, Euclides Belo, hala’o vizita dahuluk ba postu UPF foun iha suku Saburai. Imajen Tatoli/Sérgio da Cruz.

DILI, 22 jullu 2021 (TATOLI)—Parlamentu Nasionál (PN) liuhosi Komisaun B ne’ebé trata asuntu Negósiu Estranjeiru, Defeza no Seguransa, husu Polísia Nasionál Timor-Leste (PNTL) kontrola maka’as fronteira entre Timor-Leste (TL) ho Indonézia ho rigorozu, nune’e kombate pandemia COVID-19.

Notísia Relevante: Prevene variante Delta COVID-19, PN husu Governu rigorozu kontrola pontu entrada

Prezidente Komisaun B, Deputadu José Agostinho Siqueira “Somotxo” hateten, atividade movimentu ilegál iha fronteira ne’e la’ós foin COVID-19 maibé dezde uluk kedas.

Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

“Movimentu sira-ne’ebé iha fronteira ba-mai ne’e tenke kontrolu ho rigór tanba pandemia sempre mai hosi li’ur. Estadu, serbisu informasaun intelijénsia hatene hotu katak pandemia la’ós ita mak prodús iha ita-nia rai laran maibé mai hosi li’ur. Tanba ne’e, PNTL tenke kontrola ho másimu,” Prezidente Komisaun B informa ba jornalista sira, iha resintu Parlamentu Nasionál, kinta ne’e.

Oras ne’e rai hotu-hotu preokupa mak variante foun Delta COVID-19 tanba tama ona territóriu Indonézia nian, entaun Timor-Leste tenke antesipa.

“Movimentu ilegál ne’ebé ba-mai ne’e konserteza hakarak ka lakohi sira sei lori variante Delta mai tama Timor. Tanba ne’e responsabilidade ba ita-nia polísia no militár sira iha fronteira, sira tenke serbisu maka’as liu-liu ita-nia serbisu intelijénsia nia tilun no matan mak ita-nia polísia intelijénsia informasaun,” nia dehan.

Bainhira servisu intelijénsia informasaun la’o ho di’ak konserteza movimentu ba-mai Estadu bele hatene uluk atubele hola medida prevensaun.

“Ita tenke prevene uluk, nune’e situsaun sira labele tama mai. La’ós akontese mak foin ita book solusaun. Tanba ne’e, serbisu intelijénsia informasaun tau matan ba fronteira,” nia dehan.

Prezidente Komisaun B ne’e husu sidadaun hotu-hotu tenke asume responsabilidade, nune’e prevene moras ka virus variante Delta COVID-19 ne’e labele tama iha territóriu Timor-Leste.

“Sidadaun hotu-hotu tenke assume responsabilidade hodi hamutuk kombate COVID-19 ne’e. Se laiha, ha’u lori ha’u-nia interese, halai subar ba Indonézia no fila-fali mai lori moras ne’e,” nia akresenta.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here