Formasaun relatóriu finanseiru. Imajen/MTKI

DILI, 22 jullu 2021 (TATOLI)–Ministériu Turizmu, Komérsiu no Indústria (MTKI) hamutuk ho Programa Nasaun Unida ba Dezenvolvimentu (PNUD), Banku Nasionál Komérsiu Timor-Leste (BNCTL, sigla portugés) no Institutu Apoia Dezenvolvimentu Emprezariál (IADE) realiza formasaun relatóriu finanseiru ba ekipa sira hodi fó asisténsia ba mikro, pekena no média empreza.

“Objetivu prinsipál hosi formasaun ne’e maka atubele hatan ba rekomendasaun no preokupasaun hosi Komité Avaliasaun Garantia Kréditu inklui prienxe rekezitu hosi BNCTL, hodi bele aselera prosesu aprovasaun kréditu,” refere nota ne’ebé Agência TATOLI asesu, kinta ne’e.

Notísia relevante: MTKI-BNCTL asina akordu ho benefisiáriu garantia kréditu sosiál

Abertura formasaun ne’e hosi Vise-Ministru Komérsiu no Indústria, Domingos Lopes Antunes, hamutuk ho Diretór Ezekutivu IADE, Filomeno M. Belo, reprezentante PNUD, Francelino Guteres, no Repezentante BNCTL, Zelio B. Amaral da Costa.

Atividade ne’e dirije hosi IADE inklui funsionariu tékniku hosi Diresaun Nasionál Mikro, Pekena no Média Empreza atubele iha kuñesimentu di’ak kona-ba relatóriu finanseiru.

Enkuantu, MTKI maka responsável ba elaborasaun, ezekusaun, koordenasaun no avaliasaun polítika definidu ne’ebé aprovadu hosi Konsellu Ministru ba atividade ekonómika iha área turizmu, indústriál no komersiál, emprezariál inklui emprendedór seluk, ho obrigasaun atu dezenvolve setór privadu sira ba kriasaun empregu, rendimentu no hamoris ekonomia familiár.

Bazeia ba relatóriu levantamentu impaktu sosiu-ekonómiku hosi pandemia COVID-19 iha Timor-Leste, hatudu katak iha impaktu negativu boot tebes ba ekonomia Timor-Leste, ne’ebé iha probreza a’as 30%, pobreza multidimensaun 46%, joven dezempregu 20,3%, la asesu ba edukasaun no treinamentu, no tuir projesaun iha 2020 katak ekonomia monu besik 7% tamba pandemia.

VIII Governu Konstitusionál liuhosi MTKI estabelese ona programa garantia kréditu ne’ebé hamosu kréditu suave ne’ebé hanesan polítika hodi fó biban ba mikro, pekena no média empreza ne’ebé foin hahú no eziste atu asesu finanseiru liuhosi kréditu suave ho juru mínimu 3% no períodu grasa durante fulan tolu to’o neen.

Tuir rekomendasaun hosi Komité Garantia Kréditu katak empreza sira ne’ebé eziste ona tenke iha relatóriu finanseiru, kompostu hosi Komponente income statement, balance sheet, no estratu fluxu kaixa, nune’e bele fasilita komité atubele halo avaliasaun proposta ho lais no fó rekomendasaun nesesáriu ba proponente sira atu asesu ba fasilidade kréditu.

Jornalista : Florêncio Miranda Ximenes

Editora     : Julia Chataraina

HAKEREK NO HATÁN

Please enter your comment!
Please enter your name here