Ministra Solidariedade Sosiál no Inkluzaun, Armanda Berta dos Santos. Imajen/Egas Cristovão.

DILI, 22 jullu 2021 (TATOLI)—Ministra Solidariedade Sosiál no Inkluzaun (MSSI), Armanda Berta dos Santos, hateten MSSI nia planu estratéjiku ida mak atu akomoda orientasun polítika ne’ebé foka liu ba Protesaun Sosiál iha Timor-Leste.

“MSSI nia planu estratéjiku ida mak atu akomoda orientasaun polítika ne’ebé ligadu ba programa Protesaun Sosiál iha Timor-Leste ho pilar importante mak hanesan kuida saúde bazíka, bem estar no asisténsia sosiál konsidera polítika no programa sira-ne’ebé implementa ona iha tinan 10 ba kotuk,” Armanda Berta dos Santos hateten liuhosi diskursu iha enkontru ho Parseiru Dezenvolvimentu sira, iha Hotel Timor, Dili, kinta ne’e.

Objetivu hosi enkontru ne’e atu bele haree hamutuk apoiu sira-ne’ebé durante ne’e parseiru sira forñese desde tinan naruk ona, nune’e parte hotu-hotu hakarak atu haree fali planu prioridade Governu nian liu-liu ba programa Protesaun Sosiál, hodi aliña ho MSSI nia planu estratéjiku ba tinan fiskál 2021-2025.

“Ida-ne’e kontribui ba atinje Planu Estratéjiku Dezenvolvimentu Nasionál (PEDN) 2011-2030 no Objetivu Dezenvolvimentu Sustentável (ODS),” nia dehan.

Kopromisu VIII Governu Konstitusionál ne’ebé rekuñese papél importante ba redusaun pobreza iha Timor-Leste mak MSSI hahú dadaun projeta reforma ba programa bolsa da mãe ba jerasaun foun, hanesan instrumentu ida hodi tulun daudauk todan ne’ebé família balun enfrenta.

“Ita hotu hein katak ho implementasaun programa bolsa da mae jerasaun foun bele hatudu impaktu ne’ebé pozitivu, liu-liu iha ámbitu redusaun pobreza mellora rezultadu iha saúde, nutrisaun no edukasaun. Nune’e, neneik no bebeik MSSI ho apoiu parte relevante sira bele lori timor-oan sira ba ambiénte moris ho kondisaun bem estar ne’ebé di’ak.

Kooperasaun entre MSSI ho parseiru sira hotu nia instrusaun hatudu ona ambiénte ne’ebé armónia no saudavel tebes no parseiru sira-nia esforsu atu hamutuk ho MSSI ida-ne’e bele atinje meta ne’ebé trasa ona tuir padraun PEDN no ODS.

Retornu aas liu ba investimentu kapitál umanu akontese bainhira labarik sira sei ki’ik liu, bainhira labarik sira ho nutrisaun di’ak mak sira-nia saúde di’ak no sei determina futuru bem-estar no prosperidade hosi individu no jerasaun foun forte maka nasaun mós forte.

MSSI nia programa ba tinan lima oin mai (2021-2025) ne’e kuaze kobre pilar hirak-ne’e ho programa prinsipál ualu (8) mak programa sistema integradu, protesaun sosiál ba siguransa sosiál, programa asisténsia sosiál, programa reinsersaun no inkluzaun komunitaria, programa protesaun direitu ema ho defisiénsia, programa protesaun direitu labarik, programa kombate HIV/SIDA, programa rehabilitasaun nasionál, no programa Boa-Governasaun no jestaun dezenvolvimentu.

Programa hirak ne’e, projeta ona atu atinje objetivu estratéjiku sira hanesan haktuir iha vizaun no misaun MSSI nian mak atu asegura provizaun seguransa sosiál ba sidadaun Timor-Leste tomak, hamenus ki’ak no hamlaha hodi garante protesaun sosiál no justisa sosiál ba ema sira-ne’ebé iha situasaun vulneravel iha Timor-Leste.

MSSI nia papél mak atu estabelese sistema seguransa sosiál universál liuhosi kontribuisaun garantidu ba servisu-na’in sira-hotu, asegura operasionalizasaun lei kuidadu labarik, adosaun no orfonatu asegura katak 40% hosi labarik ho defisiénsia partisipa iha ensiñu báziku dezenvolve pakote rede seguransa sosiál ba família vulneravel sira.

Daudaun ne’e, MSSI nafatin servisu hamutuk ho parseiru sira hodi hadi’ak di’ak liután povu ba moris di’ak, hasai hosi mukit, hadi’ak nutrisaun no asesu ba eskola. 

“Ha’u mós haree ona nota balun liuhosi enkontru tékniku sira ba apoiu parseiru sira-ne’ebé durante ne’e hala’o ho koperasaun ho MSSI liuhosi dirasaun relevante sira la’o di’ak tebes. Ha’u hakarak aprezenta mós votu de agradesimentu ba biban sira-ne’e,” nia dehan.

Parseiru dezenvolvimentu ne’ebé partisipa iha reuniaun mak reprezentante hosi embaixada australia Carli shillito, Kordenadór Rezidensia ONU Roy Trivedy,   Reprezentante UNDP Tuya Altangerel, Reprezentante Banku Mundial Ilsa Meidina, Reprezentante UNICEF Emmanuelle Collet, Reprezentante UNCDF Claude Nomsi Mpirat, Reprezentante ILO Rita Fernandes, Reprezentante WFP Dageng Liu, Reprezentante ADB Sunil Smitra, Reprezentante PHD Inga Mephan, Reprezentante CATALPA Internationál David Roach no Diretór Jerál Ministériu Finansa (MF) Antonio Freitas.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here