Ministra Saúde, Odete Maria Freitas Belo, hamutuk ho ekipa Serbisu Sentrál Ministériu Saúde dezloka ba Suku Lepo, Covalima, hodi hala'o diálogu ho komunidade sira. Imajen/MS

COVALIMA, 22  jullu 2021 (TATOLI)-Situasaun pandemia COVID-19 la’ós lori de’it ta’uk ba komunidade tanba perigu hosi peste letál ne’e. Maibé komunidade mós ta’uk atu ba halo tratamentu iha ospitál tanba ho nia rekizitu tenke teste swab.

Notísia Relevante : MS sei lansa kampaña konjunta munisipál vasinasaun COVID-19

Molok situasaun pandemia global ne’e, abitante sira moras sempre hakbesik ba konsulta iha ospitál, maibé ikus-ikus ne’e sira la ba ona halo konsulta saúde iha ospitál tanba tenke teste swab ne’ebé maioria hatudu  rezultadu  pozitivu.

“Ita-nia komunidade ne’ebé moras la mai konsulta iha ospitál, tanba ne’e maka sala baixa adultu nian iha ospitál ne’e mamuk,” Ministra Saúde, Odete Maria Freitas Belo, hateten ba jornalista sira bainhira halo vizita ba Ospitál  Referal Covalima, kinta ne’e

“Ha’u  hakarak deklara no fó atensaun ba povu tomak katak, lalika ta’uk halo teste swab. Ita swab sai hanesan sidadaun Timor , ita hakru’uk ba medida sira no asaun prevensaun COVID-19, moras tenke halo konsulta. Labele to’o tempu imi moras todan iha uma mak ita ba foti bele salva no bele mós la salva,” Ministra Odete hateten.

Lori Governu nia naran, Ministra Saúde Odete Maria Freitas Belo, husu ho favor ba povu atu moras rasik ba konsulta iha ospitál.

“Teste swab ne’e hanesan intervensaun preliminaria nune’e la bele fahe moras ba ema seluk ka ba família seluk,”  Ministra Odete aprofunda tan.

Iha sorin Seluk, Diretór Ospitál Referral Covalima, José M. Ferreira, hateten maske pasiente menus konsulta no baixa, maibé ospitál nakloke ba ema hotu  iha kualkér oras no kualkér tempu.

“Antes situasaun COVID-19 , ami atende fó partu ba inan isin-rua kada loron  bele atende ema na’in rua ka tolu, maibé iha situasaun COVID-19 bele mós  iha no bele mós laiha. Tanba ne’e husu ba komunidade la bele ta’uk atu konsulta,” José M. Ferreira hateten.

Pesoál saúde  ne’ebé servisu iha Ospitál Referral Covalima hamutuk na’in-117 kompostu hosi médiku espesialista na’in-hat (4), médiku estranjeiru hosi Cuba na’in-10

Jornalista       : Celestina Teles

Editór             : Francisco Simões

HAKEREK NO HATÁN

Please enter your comment!
Please enter your name here