Primeiru-Ministru, Taur Matan Ruak, prezide reuniaun daruak CCARI, iha Palásiu Governu, kinta (22/07). Imajen TATOLI/Egas Cristóvão

DILI, 22 jullu 2921 (TATOLI)–Primeiru-Ministru (PM), Taur Matan Ruak, prezide reuniaun daruak Komisaun Koordenasaun no Akompañamentu ba Reforma Institusionál (CCARI, sigla portugés), ne’ebé sai nu’udar responsável orienta implementasaun inisiativa reforma.

Tuir Ministru Prezidénsia Konsellu Ministru, Fidelis Manuel Leite Magalhães, komisaun ne’e hanesan sumbriña ne’ebé lidera hosi PM ho koájuva hosi Prezidénsia Konsellu Ministru (PCM, sigla portugés) hodi asegura inisiativa reforma Estadu la’o ho di’ak.

“Objetivu reuniaun atu identifika dezafiu iha prosesu kada inisiativa reforma, nune’e bainhira iha dezafiu ruma karik sei hato’o ba membru seluk hodi asegura kada reforma ida ho reforma seluk bele komunika ba malu hodi hetan objetivu ne’ebé di’ak,” Ministru hateten hafoin ramata reuniaun iha Palásiu Governu, kinta ne’e.

Reforma institusionál iha ligasaun ho objetivu komún atu hadi’a jestaun no funsionamentu setór públiku no asegura katak Estadu funsiona iha kuadru legalidade no seguransa jurídika ne’ebé efetiva ho maneira ne’ebé efesiente no efikásia liu.

Nune’e, rezultadu reuniaun identifika dezafiu sira ne’ebé enfrenta hela atubele solusiona.

“Dezafiu mak hanesan koordenasaun, prosesu legál sira ne’ebé presiza apoiu, presiza konsertasaun polítika atu reforma sira  bele avansa ho lalais, presiza seriedade Governu atu orsamenta hodi nune’e programa reforma  bele iha rekursu finanseiru atubele la’o inklui prioritiza mós programa reforma ne’e hanesan programa ida iha programa Governu,” nia subliña.

Komisaun ne’e koordena no halo akompañamentu ba implementasaun hosi programa reforma institusionál Estadu tomak nian, ne’ebé iha komponente sira maka komisaun tau-matan hanesan andamentu prosesu reforma administasaun públika ne’ebé lidera hosi PCM, reforma iha jestaun finansa públika no reforma judisiária ne’ebé lidera hosi Ministériu Finansa (MF), no reforma desentralizasaun administrativa ne’ebé lidera hosi Ministériu Administrasaun Estatál (MAE).

Reuniaun ne’e partisipa hosi Ministru Administrasaun Estatál, Miguel Pereira de Carvalho, Ministru Justisa, Manuel Cárceres da Costa, no Vise-Ministra Finansa, Sara Lobo Brites.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here