Adjuntu Diretór Servisu Saúde RAEOA, Fugundo Lafo. Imajen Tatoli/Abilio Elo Nini.

OÉ-CUSSE, 22 Jullu 2021 (TATOLI)—Kobertura kampaña imunizasaun Bacille Callmete-Guérin (BCG) ba labarik ka bebé ho idade tinan lima (5) mai kraik hamutuk 8.022 (70%) mak partisipa iha programa imunizasaun iha Rejiaun Administrativa Espesiál Oé-Cusse Ambeno (RAEOA).

“Trajetu anuál ne’ebé RAEOA simu hosi Ministériu Saúde 1.176 no kada programa adota indikadór sira atu atinje iha tinan ne’e tenke atinje 80%-95% kobre ba programa imunizasaun hotu. Programa Imunizasaun BCG hosi janeiru-juñu, servisu saúde rejionál rejista ona no fó ona imunizasaun ba labarik 8.022 ho nia atinjementu 70%. Espera katak maske iha surtu COVID-19 maibé programa esensiál sira la’o ho di’ak,” Adjuntu Diretór Servisu Saúde RAEOA, Fugundo Lafo, informa ba Agência Tatoli iha nia servisu fatin, bairru Santa Rosa, suku Costa, sub-rejiaun Pante Makasar, Oé-Cusse, kinta ne’e.

Nia garante katak iha tinan ne’e RAEOA sei atinje to’o 90% tanba tempu sei iha atu kontinua fó imunizasaun, tanba imunizasaun ne’e importante tebes ba labarik sira atu hasa’e sira-nia imunidade hodi kontra moras oioin tanba bebé sira foin moris mai ne’e risku boot tebes atu afeta virus no bakteria.

“Kobertura imunizasaun iha RAEOA ba hepatitis halo ona vasinasaun hamutuk 705 no atinje ona 60%, polio-3 vasina ona 685 ne’e atinje ona 98% no polio difteria no hepatitis-3 hamutuk 685 98%. Iha mós imunizasaun Sarampu Rubela trimestre primeiru rejista ona 641 ne’ebé atinje ona 55% no trimestre segundu rejista ona 352 no atinje ona 30%,” nia dehan.

Durante implementasaun vasinasaun imunizasaun ne’e, ekipa servisu saúde rejionál konsege deteta iha trimestre primeiru rejistu labarik sofre moras Tubercoloze (TBC) hamutuk 12 no iha trimestre segundu rejista kazuhamutuk hitu (7).

Taxa partisipasaun komunidade iha baze antes pandemia COVID-19 ne’e la’o di’ak tanba programa imunizasaun sai hanesan esenesiál ho rutina ne’e la’o ba komunidade sira liu-liu ba labarik hosi tinan lima (5) mai kraik, maibé durante pandemia ne’e fó impaktu barak ba partisipasaun iha vasinasaun rutina.

Durante implementasaun ne’e, obstaklu boot-liu ne’ebé servisu saúde sira enfrenra mak atendimentu la másimu tanba surtu COVID-19 no rekursu umanu ne’ebé postu no sentru saúde inklui rekursu humanu iha rejiaun, sira tenke destaka ba iha pilár sira nune’e fó apoiu ba atendedimentu surtu COVID-19.

Kona-bá fasilidade no rekursu umanu, nia dehan, RAEOA laiha obstaklu tanba iha fasilidade ba postu saúde 19 no servisu saúde rejionál instala ona jelera vasinasaun iha postu saúde sira iha teritoriu Oé-Cusse.

“Impaktu ida mak bainhira eletrisidade mate, entaun iha área remota sira susar tanba dezastre naturál afeta ba ahi entaun ne’e fó impkatu ba vasinasaun sira,” nia dehan.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here