Estudante iha eskola Ensinu Sekundáriu Jerál, Dom Martinho da Costa Lopes (DMCL), Maliana, hala’o hela limpeza, hodi prepara ba ezame periúdu daruak, kinta (22/07/21). Imajen Tatoli/Sérgio da Cruz.

BOBONARO, 22 jullu 2021 (TATOLI)—Estudante hosi eskola Ensinu Sekundáriu Jerál (ESJ), Dom Martinho da Costa Lopes (DMCL), Maliana, preparadu atu partisipa iha ezame periúdu daruak, ne’ebé sei realiza iha fulan oin.

“Konsellu profesór prepara ona komisaun atu elabora pontus ezame ba finalista sira. Ita fó liu prioridade ba pontus ho versaun ezame nasionál, nune’e bele abitua iha periúdu daruak,” Diretór eskola, Juvencio de Jesus, hateten ba jornalista-sira iha knaar fatin Maliana, kinta ne’e.

Notísia relevante:Eskola sei fó sansaun ba estudante fuma sigaru iha sala-de-aula

Daudaun ne’e, ensinu aprendizazen parsiál iha eskola ne’e halo turnu ba estudante-sira hosi désimu primeiru anu no désimu segundu anu, semana ida tama dala rua, enkuantu finalista-sira kontinua aula prezensiál hosi segunda to’o sábadu.

“Ami mós implementa hela grupu traballu profesór nian, programa ne’e tulun tebes aprendizazen iha turma, atu bele akumula disiplina sira hosi konteúdu ida ba konteúdu seluk. Tanba ne’e, ami garante estudante-sira bele kompriende iha ezame,” nia esplika.

Estudante Miguel de Araújo konsidera situasaun COVID-19 impede duni prosesu aprendizazen prezensiál, maibé hanesan estudante nafatin iha devér tomak atu estuda, tanba ne’e preparadu atu partsipa iha ezame periúdu daruak.

Tuir kalendáriu hosi Ministériu Edukasaun Joventude no Desportu (MEJD), ezame periúdu daruak sei akontese iha 02 agostu bainhira Governu la halo alterasaun.

Tuir dadus, totál estudante iha eskola Ensinu Sekundáriu Jerál, Dom Martinho da Costa Lopes, Maliana, hosi désimu anu  to’o désimu segundu anu ne’ebé atu partisipa ezame periúdu daruka hamutuk na’in 2.586.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here