Diretór Ezekutivu Centro Nacionál Chega (CNC-Sigla Portugués), Hugo Maria Fernandes. Imajen Tatoli/Francisco Sony

DILI, 22 jullu 2021 (TATOLI)-Centro Nacional Chega (CNC) no Universidade da Paz (UNPAZ) partisipa formasaun School Southeast Asian University Partnership for Peacebuilding and Conflict Transformation (SAUP) ka Summer School ne’ebé oferese hosi Universidade Philipps Marburg Alemaña.

Diretór Ezekutivu CNC, Hugo Maria Fernandes, hateten kona-ba programa Summer School ne’e fornese la’ós de’it ba CNC no UNPAZ, maibé programa refere ba nasaun tolu hanesan, Cambodia ba Universidade Battabang, Filipina Universidade Mandanao inklui Timor-Leste (TL) mak CNC no UNPAZ.

“Objetivu prinsipál hosi formasaun ne’e mak CNC no UNPAZ halo parseria ho universidade Cambodia no Filipina hodi promove programa estudu pás nia tanba hakarak hosi tinan ne’e ba oin dahuluk atu haree oinsá mak universidade sira ka Institutu Ensinu Superior sira iha rejiaun partikularmente TL UNPAZ bele dezenvolve kubíkulu kona-ba estudu paz nian iha ensinu superiór,” diretór ezekutivu Hugo Maria Fernandes informa ba Agência Tatoli iha nia-knaar fatin CNC, Balide, Dili, kinta ne’e.

CNC ho UNPAZ iha nota entendimentu ida atu halo parseria ida hodi dezenvolve kurríkulu ba iha ensinu superiór liuliu hahú iha UNPAZ lai bainhira iha ona rezultadu mak foin kontinua ba universidade sira seluk.

Hosi programa Summer School kona-ba dezenvolve kubíkulu kona-ba estudu paz nian iha ensinu superiór. Aleinde ida ne’e, TL, Cambodia no Filipina, atu hahú halo koneksaun entre instituisaun sira iha nasaun tolu, atu iha koñesimentu kona-ba konflitu ne’ebé akontese iha tempu pasadu entre nasaun tolu refere, bele buka meiu oinsá introdús mekanizmu bá rezolusaun konflitu sira.

Liuhosi programa Summer School ne’e importante ba CNC planu estratéjiku CNC nian ba tinan lima mai, ne’e neineik atu halo transformasaun ida hosi CNC nu’udar sentru ne’ebé mak durante ne’e implementa rekomendasaun hosi Chega bá iha sentru estudu rezolusaun konflitu.

“Ne’ebé mak bazeia ba esperiénsia tinan naruk Timor nian bele mós sai nu’udar fatin ida ba aprendizajen no mós fahe koñesimentu,” Hugo Maria Fernandes hateten.

Nia afirma, programa Summer School ne’e hala’o durante loron lima hahú iha segunda (19/07) sei ramata aban (23/07) no programa refere bá nasaun tolu entaun formasaun ne’e maneira ho online.

Iha fatin hanesan, Vise-Reitór asuntu Kooperasaun Internal ho External UNPAZ, Luis Pereira Cardoso, hateten, programa Summer School ne’e importante tebes tanba planu bá oin UNPAZ sei harii Sentru Estudu ba PAZ.

“Antes ne’e, ami mós ba vizita ona Philipps University Marburg (PUM) Alemaña, tanba ne’ebá koñesidu ho estudu pás (Peace Study) no sira mós lori ami bá fatin Gesellschaft Fur Internationale (GIZ) Alemaña, entaun ikus mai implementa  programa Summer School ne’e,” nia hateten.

Liuhosi programa Summer School ne’e, nia dehan, sira aprende buat barak  kona-ba pás nian hamutuk ho Universidade Battambang Cambodia no Universidade Mandanao, tanba ne’e entre CNC no UNPAZ sei implementa kona-ba área paz ninian.

Kona-bá atu estabelese estudu pás (Peace Study) nian sira halo ona planu ba tinan ne’e duni, tanba bainhira programa Summer School ne’e ramata sira halo survey bá terrenu atu foti opiniaun hosi ne’ebé ko’alia kona-ba paz nian.

“Ami sei halo ona survey hamutuk ho organizasaun ne’ebé luta ba pás nian, halo diskusaun hamutuk foti sira-nia opiniaun kona-ba estudu paz nian iha nivel mestradu ninia, hafoin ida ne’e mak  ita halo rejistu iha Ajénsia Nasionál Akreditasaun Akadémika (ANAA sigla-portugés), bainhira ANAA fó ona lisensa mak formalmente ita estabelese estudu pás,” nia hateten.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here