Presidente CCI-TL, Oscar Lima. Imajen TATOLI/Egas Cristóvão

DILI, 22 jullu 2021 (TATOLI)-Prezidente Kámara Komérsiu Indústria Timor-Leste (CCI-TL, sigla portugés), Oscar Lima, konsidera programa Cesta Bázika ne’ebé implementa hosi VIII Governu Konstitusionál valoriza produtu lokál ne’ebé prodúz hosi povu agrikultutór sira.

“Programa ne’e fó benefísiu boot ba populasaun, liuliu povu agrikultór sira tanba bele valoriza no hafolin produtu lokál hanesan hare, batar no produtu agríkola seluk, ne’ebé uluk agrikultór sira prodúz no rai barak maibé ema la sosa,” Prezidente CCI-TL hateten ba Agência TATOLI, iha ninia knaar fatin, Acait, kinta ne’e.

Programa Cesta Bázika iha ámbitu rekuperasaun ekónomiku ba kurtu prazu ho objetivu atu fó apoiu nesesidade bázika ba populasaun, kombate hamlaha ba família vulnerável liu, apoiu ba agrikultór, produtór no komersiante lokál.

Nune’e, emprezáriu timor-oan ne’ebé partisipa mós iha programa ne’e haktuir, empreza ne’ebé partisipa, perkorre territóriu laran hodi sosa produtu lokál.

“Ami halo levantamentu dadus kona-ba produtu lokál, kuaze 90% resin mak sosa iha munisípiu Viqueque, Lautém, Bobonaro no Covalima,” nia hatutan.

Bazeia ba diploma ministeriál konjutu númeru 38/2020, 26 outubru, produtu ne’ebé tama ba lista programa ne’e hanesan produtu alimetár, kompostu hosi foos, batar, kote/fore, amendoim, sorghum dulas, kafé, fehuk ropa, susu ben, masin midar, manu, manu tolun, mina tein, mina nú, trigu, inklui moda sira hanesan ervilla, tomate, koto nurak, fore sikore, repullu, kouve, modo metan, modo mutin no modo seluk tam, enkuantu ba produtu ijiene maka, sabaun, álkool Jl, deterjente, eskova nehan, pasta nehan.

“Ha’u haree programa Cesta Bázika ne’e di’ak tanba emprezáriu sira sosa produtu agrikultura no motiva ema komesa halo ona natar no toos,” nia hatutan.

Nune’e, CCI-TL espera katak Governu iha polítika atu kontinua nafatin programa ne’e atu povu agrikultór halo produsaun barak liután.

Kompañia timor-oan domina fornese Cesta Bázika

Bazeia ba dekretu-lei númeru 48/2020 loron 07 outubru, kona-ba medida apoiu atribuisaun Cesta Bázika, iha artigu 10 kona-ba modalidade ho kria rejime espesiál aprovizionamentu, Temi katak aprovzionamentu ba akizasaun produtu Cesta Bázika realiza, hatuur katak aprovizionamentu ba akizasaun produtu Cesta Bázika realiza bazeia ba modalidade ajudikasaun direita to’o limite verba ne’ebé aloka ba entidade ajudikante ne’ebé ministériu indika ona.

Nune’e, Governu kotrata kompañia fornesedór Cesta Bázika iha territóriu nasionál hamutuk 232, ho kálkulu fó servisu ba timor-oan hamutuk 100.080 hodi fornese ai-han ba populasaun millaun 1,5, ne’ebé kada ema hetan sasán ho valór $25 durante fulan-rua.

“Empreza nasionál domina kuaze 90% iha programa Cesta Bázika hodi distribui ai-han ba populasaun iha territóriu tomak, maibé iha empreza lokál ida ou rua mak fa’an ba kompañia internasionál, maibé ne’e oituan tebes no la to’o 10% mak fa’an ninia servisu ba ema seluk,” Prezidente CCI-TL klarifika.

Iha fulan-marsu to’o inísiu jullu 2021, Ministériu Finansa (MF) realiza ona pagamentu Cesta Bázika (faze I no II) hamutuk millaun $41,2.

Foin lalais ne’e, MF aprova ona commitment payment voucher (CPV) foun Cesta Bázika hamutuk 108, kompostu hosi Ministériu Turizmu, Komérsiu no Indústria (MTKI) iha CPV 67 ho montante millaun $21,3, Sekretaria Estadu Kooperativa (SEKoop) iha CPV 17 ho montante millaun $7,9 ho Ministériu Agrikultura no Peska (MAP) iha CPV 24.

Totál orsamentu ba programa Cesta Bázika hamutuk millaun $82, ba totál benefisiáriu millaun 1,5 tuir lista atuál hosi Ministériu Administrasaun Estatál (MAE).

Jornalista   : Florêncio Miranda Ximenes

Editora       : Julia Chatarina

HAKEREK NO HATÁN

Please enter your comment!
Please enter your name here