Administradór Munisípiu Manufahi, Arantes Isaac Sarmento. Imajen/Espesiál

DILI, 22 jullu 2021 (TATOLI)-Asosiasaun Servisu Redusaun Risku Dezastre-Timor-Leste (ASERD-TL) fó formasaun ba nia membru hamutuk ema na’in-34 kona-ba reforsa membru sira-nia kapasidade hodi dezenvolve instituisaun.

Administradór Munisípiu Manufahi, Arantes Isaac Sarmento informa ba Agência Tatoli, liuhosi telefónika, kinta ne’e, katak objetivu hosi formasaun ne’e oinsá hasa’e koñesimentu ba iha membru-sira hodi bele iha planeamentu instituisaun ida nia-laran.

“Ami haree formasaun ida ne’e importante tebes tanba bainhira membru-sira halo planu, proposta ruma sira iha ona koñesimentu ne’ebé ho kualidade atu bele implementa sira-nia planu ne’ebé di’ak ba ita-nia komunidade,” Arantes Isaac Sarmento hateten.

ASERD-TL fó formasaun ba nia membru sira tanba parseiru sira mós sai xave importante bá iha prosesu dezenvolvimentu bá nasaun liuliu dezenvolvimentu ne’ebé mak la’o iha munisípiu ida-idak.

Membru ASERD-TL 34 ne’ebé tuir formasaun ne’e mai hosi munisípiu 12, inklui Rejiaun Administrativa Espesiál Oé-Cusse Ambeno (RAEOA) no formasaun refere hala’o durante loron tolu hahú kuarta horiseik no sei ramata sesta aban (21-23/07).

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here