Diretór Departamentu Edukasaun Fundasaun São José Dioseze Baucau, Padre Avelino Lemos. Imajen TATOLI/Natalino Belo

BAUCAU, 21 jullu 2021 (TATOLI)–Diretór Departamentu Edukasaun Fundasaun São José Dioseze Baucau, Padre Avelino Lemos, hateten, projeitu lei nú. 29/V/(3ª) protesaun labarik no joven iha perigu, importante tanba protesaun labarik tenke hahú hosi inan nia kanotak.

“Uma-kreda haree ida-ne’e importante tebes tanba protesaun labarik la’ós haree de’it iha perigu maibé sira ne’ebé hasoru problema desde iha inan nia kanotak (isin), Uma-kreda konsidera ona hanesan labarik, tanba ne’e tenke proteje hosi ne’ebá to’o idade determinadu hosi esbosu lei ne’e katak la liu tinan 17,” Responsável Eskola Katólika São José Dioseze Baucau, informa, iha Pouzada Villa antiga, kuarta ne’e.

Tanba ne’e, Padre sente haksolok ho inisiativa hosi Governu no Parlamentu Nasionál ne’ebé hamosu ona lejizlasaun ne’e, ne’ebé envolve entidade relevante sira iha Baucau hodi halo konsultasaun públika hodi halibur rekomendasaun.

Notísia relevante: Komisaun F halo konsultasaun projetu lei protesaun labarik iha Baucau

“Haksolok ho inisiativa ida-ne’e no hakarak rona kamada sosiál iha Baucau kona-ba esbozu lei ida-ne’e,” nia akresenta.

Tuir Reponsável Eskola Katólika, opiniaun hosi entidade sira iha Baucau atu haree liu ba prinsípiu protesaun no promosaun labarik inklui definisaun iha artigu sira ne’ebé presiza akresenta tan.

Iha fatin hanesan, Deputada Komisaun F ne’ebé trata asuntu Saúde, Seguransa Sosiál, no Igualdade Jéneru, Veneranda Lemos, hateten, diskusaun sira hanesan parte ida atu fó espasu ba entidade hotu atu hato’o hanoin.

“Ita hakarak haree hosi kamada sosiál hotu oinsa fó hanoin ne’ebé refleta ba realidade Timor-Leste nia kultura, sosiál no relijiaun,” nia hatutan.

Konsultasaun públika hetan partisipasaun hosi entidade oin-oin hanesan servisu saúde no servisu edukasaun munisipál, autoridade admistrasaun munisipál, Polísia Nasionál Timor-Leste (PNTL), konviksaun relijioza hanesan Padre no Padre inklui Bispu Dioseze Baucau, Don Basílio do Nascimento.

Projetu lei ho artigu 103 ho kapítulu IX ne’e sei sai hanesan instrumentu legál save hodi proteje labarik timor-oan hotu hosi violénsia, esploitasaun, abuzu, no asegura sira-nia moris di’ak.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here