Edifisiu Parlamentu Nasional,Imajen/Antonio Goncalves.

DILI, 21 jullu 2021 (TATOLI)—Tribunál Konta (TdC, sigla portugés) halo auditoria kona-ba jestaun utilizasaun finanseira públiku no jestaun utilizasaun rekursu umanu iha Parlamentu Nasionál.

Molok halo auditoria, Sekretáriu Jerál Parlamentu Nasionál, Adelino Afonso de Jesus, aprezenta ekipa auditór sira hosi Tribunál Konta (TdC) ba Prezidente Parlamentu Nasionál, Deputadu Aniceto Longuinhos Guterres Lopes no aprezenta mós ba unidade orsamentál no unidade orgánika iha Parlamentu Nasionál.

“Tribunál Konta hala’o auditoria durante loron haat iha Parlamentu Nasionál. Auditoria ne’e hahú hosi ohin to’o tersa-feira, ne’ebé foka ba área jestaun finanseira públiku no jestaun rekursu umanu,” Sekretáriu Jerál Parlamentu Nasionál, Adelino Afonso de Jesus, informa ba jornalista sira, iha uma fukun, kuarta ne’e.

Nia esplika, ekipa Tribunál Konta (TdC) hala’o auditoria hodi hatene utilizasaun jestaun finanseira públika iha Parlamentu Nasionál hahú hosi 2017 to’o 2019 nian.

Sekretáriu Jerál Parlamentu Nasionál hateten, ekipa auditór sira hosi Tribunál Konta hakarak hatene jestaun finanseira públiku dezde 2017 to’o 2019 ne’e implementa tuir Lei Orsamentu no Jestaun Finanseira (LOGF-sigla portugés) ka lae.

Diresaun prinsipál tolu iha Parlamentu Nasionál kompostu hosi Dirasaun Jestaun Finanseira, Dirasaun Rekursu Umanu no Formasaun, Dirasaun Apoiu Parlamentár no Dirasaun Komunikasaun.

Hosi Dirasaun Jestaun Finanseira fahe ba Divizaun Finansa, Divizaun Aprovizionamentu, Divizaun Patrimóniu Lojístika no Servisu Jerál.

Nune’e mós Dirasaun Rekursu Umanu no Formasaun fahe ba Divizaun Dezenvolvimentu Rekursu Umanu, Divizaun Jestaun Administrativa Rekursu Umanu no Divizaun Sentru Formasaun Parlamentár.

Entretantu Dirasaun Apoiu Parlamentár no Dirasaun Komunikasaun fahe ba Divizaun Apoiu Plenáriu, Divizaun Apoiu Komisaun sira, Divizaun Redasaun Transkrisaun no Dokumentasaun, Divizaun Biblioteka no Arkivu.

Hosi parte Diresaun Komunikasaun kompostu hosi Divizaun Relasaun Públika Komunikasaun no Edukasaun Sívika, Divizaun Teknolojia Informasaun no Komunikasaun, Divizaun Rádiu no Televizaun, Divizaun Planeamentu, Monitorizasaun no Avaliasaun, Divizaun Protokolu, Divizaun Sentru Promosaun Igualdade no Jéneru.

Jornalista : Evaristo Soares Martins

Editór       : Cancio Ximenes

 

HAKEREK NO HATÁN

Please enter your comment!
Please enter your name here