TDD. Imajen Tatoli /Dok

DILI, 21 jullu 2021 (TATOLI)—Tribunál Distritál Dili (TDD), hala’o julgamentu ba kazu ema sivíl baku membru FALINTIL Forsa Defeza Timor-Leste (F-FDTL), na’in-ida ho inisiál JCP ne’ebé akontese iha Tasi-tolu iha 2020.

Tuir faktu hosi Ministériu Públiku (MP), ne’ebé Tribunál lee-sai katak, iha 21 agostu 2020, tuku 4:30 madrugada, bainhira lezadu sai hosi serbisu atu fila-fali ba uma to’o iha Tasi-tolu hetan pasa revista hosi arguidu JRM ho nia-maluk na’in-tolu, hodi husu osan ba lezadu atu sosa sigaru maibé lezadu osan laiha.

Notísia relevante:Lori rama ambon, TDD interroga arguidu IF

Lezadu ne’ebé nu’udár membru F-FDTL husu ba arguidu JRM koan-bá razaun saida mak tenke halo pasa revista, no lezadu rasik loke telephone, hodi komunika ba maluk seluk, maibé arguidu JRM lori fatuk hodi tuda ba lezadu kona iha parte ibun to’o naklés ran sai makás no nehan oin ida monu.

Alende ne’e, lezadu dezmaia monu ba kuaze minutu 15, inklui telefone ida ho folin $250 hetan estragu.

Hafoin ne’e, lezadu ba halo tratamentu iha ospitál suku kanek ne’ebé iha ho pontu lima.

Hahalok arguidu nian obriga ema seluk hodi ameasa hetan vantajen patrimonial, nune’e MP akuza  JRM hanesan autór materiál konkursu ba krime  rua hanesan  danu ho violénsia  previstu iha artigu 260, ne’ebé hateten, bainhira ajente prátika faktu sira-ne’ebé hakerek hela iha artigu 258 no 259 ho violénsia hasoru ema ruma ka ho ameasa ho perigu eminente ba vida ka integridade fízika, ka tanba tau hela ema ne’e iha situasaun ne’ebé nia labele reziste, sei aplika pena prizaun tinan haat (4) to’o 12.

Krime extorsaun previstu artigu 270, deskreve iha alinea  1, ema ne’ebé ho intensaun atu hetan ba nia ka ba ema seluk enrikesimentu ilejítimu, obriga ema seluk ho violénsia ka ameasa ho mal importante, halo dispozisaun patrimonial, ne’ebé hamosu prejuizu ba ema ne’e ka ba ema seluk, sei hetan pena prizaun tinan rua  to’o neen.

Bainhira mosu sirkunstánsia ruma, prevista iha artigu 252 ajente sei hetan pena, previstu iha artigu ida-ne’ebá no alinea 3 atu hala’o prosedimentu kriminál tenke iha keixa, ne’ebé previstu hotu-hotu iha kódigu penál.

Hafoin iha sesaun julgamentu, haree ba krime extorsaun ho nia natureza semi públiku  tuir prosesu, bainhira  arguidu no lezadu iha konkordánsia  ba malu, bele dada fila hodi rezolve tuir família.

Ba parte sira iha lejitimidade hodi aprezenta akordu ba Tribunál, tanba  prosesu refere antes ne’e rezolve tuir família hosi parte arguidu fó sala ona ba lezadu ho montante osan $1.000, tais, bibi, sigarru hodi  dame-malu.

Nune’e, koletivu juiz omologa atu absolve arguidu hosi krime extorsaun iha Tribunál primeira instánsia no krime danu ho violénsia nu’udár natureza públiku, labele dada fila tanba ne’e kontinua julgamentu ba oin.

Liu hosi audiénsia julgamenutu hatan ba akuzasaun sira, arguidu JRM konfesa ho parsialmente ba Tribunál katak, faktu sira ne’e loos hotu, momentu ne’ebá sira halo asaun ne’e tanba hemu  tua lanu no konsiente hahalok ne’e ladi’ak, perante Tribunál sei la halo tan ba oin.

“Ha’u mak tuda uluk fatuk, primeiru hodi kona vítima iha parte ibun,” arguidu hateten iha sala audiénsia, TDD, Mandarin, kuarta ne’e.

Lezadu JCP, konfirma kanek ne’ebé sofre hetan tratamentu no lori tempu fulan ida mak rekopera no nehan iha rua mak daudaun sei nakdoko, ne’ebé bainhira han buat ruma sei sente moras.

Rona tiha parte sira, Tribunál adia fila-fali julgamentu ba loron seluk hodi rona sasin ne’ebé arroladu ona.

Julgamentu ne’e prezide hosi juiz koletivu, Ercília de Jesus, Afonso Carmona, Albertina Neves no MP reprezenta hosi prokuradór  na’in-ida no arguidu hetan asisténsia legál hosi defensór públiku Nelson Borges.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here