Pesoál saúde prepara hela vasina Sinovac. Imajen TATOLI/Francisco Sony

DILI, 22 jullu 2021 (TATOLI)—Portavóz Governu no Ministru Prezidénsia Konsellu Ministru, Fidelis Manuel Leite Magalhães, rejeita informasaun kona-ba sidadaun simu vasina tipu AstraZeneca de’it mak bele livre sirkulasaun, enkuantu Sinovac labele, tanba antes ne’e Governu deklara ona kualker tipu vasina kontra COVID-19 autorizadu hosi Organizauun Mundiál Saúde (OMS) ho doze kompleta bele livre sirkulasaun iha territóriu tomak.

“Atu klarifika katak vasina rua ne’ebé eziste iha ita-nia rain, iha ona desizaun hosi Ministériu Saúde katak vasina hirak ne’e rekoñese hosi Organizasaun Mundiál Saúde no iha klasifikasaun hanesan Sinovac, Sinofarm, Moderna, Pfizer no AstraZeneca sira ne’e hotu hanesan, maski vasina balun seidauk iha Timór, tanba ne’e sé de’it mak hetan kualker vasina autorizadu OMS no vasina kompletu ona, bele dezloka livremente iha territóriu nasionál,” Ministru Fidelis hateten, iha Palásiu Governu, kuarta ne’e.

Biban ne’e, Portavóz Governu husu ba entidade, liliu mídia sira atu hamutuk ho Governu hodi kombate hoax.

“Ita hotu iha dever atu luta kontra hoax tanba ema hirak ne’ebé halo hoax ne’e la’ós de’it nakar, maibé tanba falta responsabilidade, no sira ne’ebé halo hoax iha posibilidade komete aktu ilegál no ariska ema barak nia vida, satán bainhira halo manipulasaun informasaun kona-ba vasina ka kontra vasina sira,” nia akresenta.

Tuir Ministru, Governu iha responsabiliza bainhira iha kazu inkapasidade ka ema mate tanba vasina.

“Prezidénsia Konsellu Ministru iha komunikasaun ho Facebook rasik atu haree iha Timor-Leste relasiona ho uzu no abuzu sira ba plataforma mídia sosiál nian hodi espalla informasaun sira ne’ebé mak laloos,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here