Koordenadór Sentru Komunitáriu no Sentru Quesadhip Ruak (CQR), Mardoqueu Soares. Imajen Tatoli/Nelia Fernandes.

DILI, 21 jullu 2021 (TATOLI)–Sentru Formasaun Quesadhip Ruak, planea ona sei re-ativa formasaun prezensiál ba formandu sira hahú iha loron 26 fulan-jullu 2021.

Koordenadór Sentru Quesadhip Ruak, Mardoqueu Soares, informa simu ona instrusaun husi Fundadora  Isabel Ferreira, atu re-ativa ona formasaun hotu-hotu ba formandu sira ne’ebé maka durante ne’e paradu liga ho COVID-19.

“Orsida ou aban, ami sei kontaktu ba formadór ba kursu hotu, atu ami sei halo uluk reuniaun ida hodi prepara ba segunda-feira, reativa formasaun,” nia hateten ba Agência Tatoli, iha nia knaar fatin, Taibesi, Díli, kuarta ne’e.

Maibé nia dehan, antes atu re-ativa formasaun prezensiál ba formandu sira, servisu administrasaun Sentru Quesadhip Ruak sei fó sai informasaun liuhosi pájina ofisiál Isabel Ferreira, grupu whatsapp no sei kontaktu diretamente ba kada formadór.

Iha tinan 2021, Sentru ne’e rejista partisipante formasaun hamutuk ema na’in 354, kompostu husi joven ema na’in 294 no labarik na’in 60 iha área lian inglés, Korea, Japaun, komputadór, matemátika, relijiaun moral no portugés.

Nia hateten atividade formasaun ne’e paradu tiha durante ne’e tanba númeru pasiente COVID-19 aumenta makaas iha Kapitál Dili.

Tanba ne’e, Mardoqueu Soares rekomenda ba formandu no formadór sira atu uza máskara, uza hand sanitizer, garante distansiamentu fiziku no sosiál bainhira re-ativa formasaun hodi prevene transmisaun moras coronavirus iha Timor-Leste.

“Regra kona-bá COVID-19, ita nafatin kumpre medida protokolu, ami prepara hanesan antes tama aula prezensiál, estudante sira tenke fase uluk liman, uza máskara, no estudante sira tur minimu metru ida ho balun,” nia katak.

Jornalista : Nelia Fernandes

Editór       : Agapito dos Santos

HAKEREK NO HATÁN

Please enter your comment!
Please enter your name here