Distribuiaaun cesta bázika ba reklamante sira iha sub-rejion Passabe. Imajen/Mídia RAEOA-ZEESM.

OÉ-CUSSE, 21 Jullu 2021 (TATOLI)—Reklamante 601 iha suku Malelat no Abani iha sub-rejiaun Passabe, semana kotuk simu ona Cesta Bázika ne’ebé distribui hosi Autoridade Rejiaun Administrativa Espesiál Oé-Cusse Ambeno.

Notísia Relvante: Reklamante cesta bázika 2.941 iha RAEOA sei simu sira-nia direitu

“Antes ne’e reklamante iha Passabe hamutuk 601 maibé iha semana kotuk autoridade mai distribui ona no reklamante sira-ne’e simu hotu ona cesta bázika. Ha’u-nia komunidade iha suku Abani ho suku Malelat simu ona cesta bázika ne’e 100%,” Jestór sub-rejiaun Passabe, Anton Ulan, informa ba Agência Tatoli, liuhosi telefónika, kuarta ne’e.

Populasaun iha Pasabe sente kontente tanba simu ona sira-nia direitu liuhosi programa Cesta Bázika ne’ebé VIII Guvernu Konstitusionál planea no realiza.

Maske iha situasaun pandemia COVID-19 maibé Guvernu liuhosi Autoridade RAEOA konsege rezolve ona populasaun sira-nia ejizensia.

Xefe suku Abani, sub-rejiaun Passabe, Gabriél Neka, lori populasaun nia naran hato’o agradesimentu ba autoridade RAEOA tanba tuir lolos lista sira-ne’e la tuir trajetu ne’ebé Guvernu aprova, maibé autoridade hola inisiativa konsege responde populasaun sira-nia preokupasaun

Distribuiaaun cesta bázika ba reklamante sira iha sub-rejion Passabe. Imajen/Mídia RAEOA-ZEESM.

“Ami tenke agradese tanba lista reklamante sira-ne’e fora de trajetu, tanba naran ne’ebé Guvernu aprova ne’e maioria simu hotu ona. Agora, sira-ne’ebé reklamante ne’e kategoria la tama lista aprovasaun hosi Guvernu sentrál, tanba balun foin moris, balun mumentu ne’eba rekolla dadus nia laiha fatin, maibé autoridade RAEOA foti desizaun hakarak trata ema hotu hanesan,” nia dehan

Autoridade lokál ne’e sujere ba Guvernu liuhosi Autoridade RAEOA, atu mantein nafatin fó atendimentu hanesan ba sub-rejiaun sira seluk hanesan sub-rejiaun Oésilo, Nitibe no Pante Makasar, nune’e tratamentu ne’e balansu no dignu.

Antes ne’e, Koordenadór Cesta Bázika RAEOA, Maximiano Neno, promete katak iha fulan jullu nia laran ne’e autoridade sei fó apoia ba reklamante sira iha RAEOA hamutuk 2.941

“Implementasaun cesta bázika iha Timor-Leste estende-tan ba fulan ida no sei finaliza iha 31 jullu ne’e. Entaun, ita sei iha tempu semana rua tán ba oin atu bele konklui, infelizmente RAEOA ita atinji ona 100% ba distribuisaun cesta bázika normal,” nia dehan.

Nia fundamenta, dadus aprovadu hosi Guvernu sentrál ne’e to’o de’it iha 08 outubru 2020, entaun hosi 09 outubru mai oin ne’e ema balun foin moris no forma família foun ne’e, tama iha lista reklamante hamutuk 2.941

“Infelizmente pedidu ba reklamante sira-ne’e hetan ona aprovasaun hosi Prezidente Autoridade, nune’e bele rezolve iha fulan jullu ne’e nia laran,” nia esplika.

Tuir dadus ne’ebé Ajênsia Tatoli asesu, to’o oras ne’e reklamante iha RAEAO ne’ebé seidauk simu cesta bázika hamutuk 1.890 ne’e hosi sub-rejiaun Oésilo, Nitibe no Pante Makasar enkuanto iha sub-rejiaun Passabe reklamante hamutuk 601 simu ona iha semana kotuk.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here