Komunidade bainhira simu vasina AstraZeneca iha Sentru Saúde Formosa, Dili, kuarta (21/07/21). Imajen Tatoli/António Gonçalves.

DILI, 21 jullu 2021 (TATOLI)— Estimasaun hosi Serbisu Saúde Munisípiu Dili, katak populasaun iha postu adminsitrativu Cristo Rei, Dom Aleixo no Ataúro mak seidauk partisipa másima iha vasina COVID-19.

“Estimasaun partisipasaun ne’ebé ita atu atinje ba postu administrativu Dom Aleixo númeru ida ne’ebé  sei boot mak seidauk partisipa hamutuk rihun 55, postu administrativu Cristo Rei iha rihun 35 no Ataúro hamutuk 3.325,’’ Diretora Serbisu Saúde Munisípiu Dili, Agostinha Segurado, hateten ba jornalista-sira iha klínika Fatumeta, kuarta ne’e.

Notísia relevante:Xanana Gusmão kompleta ona Sinovac doze daruak

Situasaun ne’e sai nafatin preokupasaun boot ba parte Serbisu  Saúde Munisípiu Dili, maibé autoridade sira hamutuk ho parte saúde estabelese nafatin postu vasinasaun no kontinua halo diálogu, hodi bele  fó korajen ba komuniddae atu hola desizaun hodi hetan vasina.

Governu mós liuhosi Vise-Primeiru Ministru, Armanda Berta dos Santos orienta ona atu hahú ohin to’o 05  agostu iha Dili tenki esforsu maka’as atu bele konvense númeru boot ne’e hodi hetan vasina.

Parte postu administrativu Dom Aleixo iha totál populasaun rihun 90-resin no hosi númeru ne’e, ema ne’ebé simu ona vasina hamutuk rihun 49 no rihun 55-resin mak seidauk simu.

Iha postu administrativu  Cristo Rei ho totál populasaun rihun 80-resin no sira ne’ebé seidauk simu vasina rihun 35.

“Entaun, hosi pursentu entre ema ne’ebé simu ona no seidauk simu hanesan. Kona-ba Ataúro mós ita-nia  estimasaun ne’e  hatudu 7.167, hosi ida-ne’e 3.745 mak simu ona vasina no sira ne’ebé seidauk simu hamutuk rihun 3-resin,” nia esplika.

Iha parte dadeer, hafoin kompleta vasina Sinovac doze daruak, líder karismátiku Kay Rala Xanana Gusmão, preokupa ho  númeru ne’ebé mai hosi postu administrativu tolu mak seidauk simu vasina.

Tanba ne’e, husu ba administradór postu, xefi suku, xefi aldeia tenke fó informasaun ne’ebé klaru no loloos, hodi halo sensibilizasaun nafatin ba komunidade kona-bá vasina, tanba moras ne’e la’ós halimar maibé moras ne’e perigu ba ema nia saúde.

Jornalista  : Felicidade Ximenes

Editór        : Cipriano Colo

HAKEREK NO HATÁN

Please enter your comment!
Please enter your name here