PA RAEOA inaugura kuarentena no rezidénsia ba pesoál saúde sub-rejiaun Nítibe. Imajen Tatoli/Abilio Elo Nini.

OÉ-CUSSE, 21 Jullu 2021 (TATOLI)—Prezidente Autoridade (PA) Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e inaugura kuarentena no rezidénsia ba pesoál saúde iha aldeia Manan, suku Bene-Ufe, sub-rejiaun Nítibe.

Notísia Relevante: PA RAEOA inaugura kuarentena iha Pasabe

PA RAEOA inaugura kuarentena no rezidénsia ba pesoál saúde sub-rejiaun Nítibe. Imajen Tatoli/Abilio Elo Nini.

“Autoridade konstrui tán obra ida-ne’e, ha’u haree fasilidade ne’e di’akliu sentru saúde Baoknana, inklui postu saúde sira barak. Ita hanoin ona kuarentena ne’e atu sai sentru saúde tanba iha suku Bene-Ufe komunidade barakliu fali sira iha Baoknana. Entaun, aban bairua ita sei muda sentru saúde mai fali iha aldeia Manan,” Arsénio Bano ko’alia iha ámbitu serimónia inaugurasaun ba kuarentena, iha sub-rejiaun Nítibe, kuarta ne’e.

Nia husu ba lideransa komunitáriu sira iha suku Bene-Ufe atu uza didi’ak fasilidade ne’e tanba autoridade ajenda ona iha semana rua tán sei kompleta fasilidade saúde no pesoál saúde atu destaka ona iha kuarentena foun ne’e

Nia husu ba populasaun iha suku Bene-Ufe atu uza didi’ak fasilidade ida-ne’e, tanba ne’e hanesan sentru fasilidade uza ba konsulta ninian nomós uza ba kuarentena bainhira iha sidadaun balu hakat liu mai iha fronteira sei kumpre uluk loron 14 hafoin hamutuk ho família sira.

Diretór Infraestrutura RAEOA, Cândido dos Reis Amaral, esplika konstrusaun kuarentena ne’e kumpre nia durasaun kontratu fulan neen no kompleta ho fasilidade hanesan lutu haleu ho medida metru 320 ne’ebé konstrui hosi empreza Fortaleza Unipesoal, Lda.

“Ita hotu sai sasin ba obra ne’e, entrega fila-fali obra ne’e ba nia na’in. Hein katak ho obra ida-ne’e bele uza ho di’ak tuir nia funsaun ne’ebé autoridade planeia ona atu tulun komunidade iha área saúde nian,” nia dehan.

Entretantu Xefe suku Bene-Ufe, Marcos Meni, agradese autoridade RAEOA tanba konsege hakat ba suku Bene-Ufe nune’e entrega fasilidade saúde ba iha komunidade.

“Ohin, entrega ona fasilidade saúde ne’e ba komunidade atu uza ba konsulta inklui uza mós ba kuarentena. Ha’u fiar katak obra ne’e sei fó tulun ba ha’u-nia populasaun atu-bele asesu ona fasilidade saúde, tanba antes ne’e ami ba konsulta iha sentru saúde Baoknana ne’ebé ho distansia dook tebes,” líder komunitáriu felisita autoridade RAEOA.

Sekretáriu Rejionál ba Asuntu Saúde, Manuel da Costa, esplika daudaun ne’e uza fundu COVID-19 konsege konstrui ona kuarentena hamutuk lima iha sub-rejionál haat kompostu hosi sub-rejiaun Pante Makasar iha kuarentena Sakato iha suku Nipani no kuarentena Kiomaonteko iha suku Costa.

Nune’e mós iha sub-rejiaun Oésilo konstrui kuarentena iha suku Bobometo, iha sub-rejiaun Pasabe konstrui kuarentena iha suku Abani, iha sub-rejiaun Nítibe konstrui kuarentena iha suku Bene-Ufe no falta ida iha sub-rejiaun Pante Makasar iha Portu Kitahara Mahata.

Entretantu konstrusaun Kuarentena iha Suku Bene-Ufe konstrui hosi empreza Lorotias Unipesoál, Lda, ho montante orsamentu rihun $109-resin, ho durasaun kontratu fulan neen, ho nia medida metru 26×10 no fasilidade hanesan kuartu 11, hariis-fatin 13 no sala enkontru ida.

Enkuantu rezidensia pesoál saúde nian konstrui hosi empreza Hunu Bahalaco Unipesoál, Lda, ho montante orsamentu $47.059.28, durasaun kontratu fulan haat ho nia medida uma metru 16×7,50.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here