Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 21 jullu 2021 (TATOLI)--Ministru Petróleu no Minerál, Víctor da Conceição Soares, hateten, nia parte prontu fó apoiu polítika ba empreza Timor Resources atu fasilita viajen ekipa téknika hosi Indonézia no Austrália, atu halo preparasaun ba perfurasaun mina-matan iha rai-maran Kosta Súl.

“Ita tenke fó apoia tanba Governu hakarak diversifika no ita hakarak fó duni apoiu polítiku ba atividade fura mina-matan ne’e atubele iha progresu lalais,” Ministru Víctor hateten ba Agência TATOLI, iha Pálasiu Governu, kuarta ne’e.

MPM no Autoridade Nasionál Petróleu no Minerál (ANPM), antes ne’e, atribui ona lisensa ambientál ba empreza australianu ne’e atu hahú halo preparasaun ba perfurasaun dahuluk.

Notísia relevante: Governu atribui lisensa ambientál ba Timor Resources fura mina-matan

Tuir planu, iha loron 21 setembru tinan ne’e, Timor Resources hahú halo atividade dahuluk iha área Matai no perfurasaun daruak iha área Camasa, Suai.

“Ha’u hasoru ona empreza nia Diretór no sira husu atu Governu apoiu lori tékniku sira hosi Indonézia mai iha Timor-Leste, maibé ita iha Dekretu-Lei ne’ebé fó exesaun ba dezenvolvimentu petróleu no gás ne’ebé bele fó lisensa tama,” nia akresenta.

Maibé,  tékniku sira nafatin tuir regra prevensaun COVID-19 iha Timór, hanesan kumpre kuaretana maski simu ona vasina kompletu, tanba Governu hakarak proteje sidadaun sira hosi moras variante foun no iha sorin seluk dezenvolvimentu setór petrolíferu mós tenke la’o.

Nune’e, VIII Governu konstitusionál mós fó prioridade atu halo diversifikasaun ba petróleu no minerál.

“Ita sei kontinua planu prioridade ba diversifikasaun petróleu, gás no minerál ne’ebé uluk ne’e ita foka de’it ba Bayu-undan no Greater Sunrise, maibé buat seluk laiha. Tanba ne’e, agora ita hakarak diversifika iha tasi laran no rai-maran,” Ministru hatutan.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here