Portavóz motorista, Abrão da Costa. Imajen TATOLI/Natalino Belo

BAUCAU, 21 jullu 2021 (TATOLI)—Motorista Bus Baucau husu ba Governu liuhosi Ministériu Seguransa Sosiál no Inkluzaun (MSSI) no Institutu Nasionál Seguransa Sosiál (INSS) atu prosesa dokumentu hodi fó apoiu  ba empregu sira iha ámbitu pandemia tanba durante ne’e menus rendimentu.

”Hanesan motorista hosi Baucau, hato’o situasaun difikuldade ba Governu atubele aselera lalais subsídiu tanba moris ne’e araska tebes, aleinde ne’e bele loke dalan atu nune’e movimentu bus la’o normál, tanba bainhira kareta la’o mak foin patraun selu, maibé agora ami la hetan osan to’o agora,” Portavóz motorista, Abrão da Costa, hateten, iha Servisu Solidaridade Sosiál munisípiu Baucau, Villa nova, kuarta ne’e.

Notísia relevante: Governu hakotu konfinamentu domisiliáriu no autoriza hikas movimentu transporte públiku

Tuir motorista, subsídiu dahuluk seidauk hetan maski sira submete ona dokumentu ba INSS, enkuantu iha faze daruak durante fulan-lima ona maibé seidauk iha informasaun klaru.

“Subsídiu daruak to’o agora ami seidauk rona rezultadu, tuir loloos Governu anúnsia hosi mídia ruma, atu nune’e bele garantia netik tanba ami-nia moris mak sai motorista ona, labele halo to’os, natar, bainhira implementa Serka Sanitária taka dalan hodi labele halo movimentu, ami atu hala’o moris oinsá,” Portavóz ne’e lamenta.

Iha fatin hanesan, Motorista Aries Fernandes husu Governu konsidera sira-nia preokupasaun no buka solusaun, nune’e transporte públiku dirasaun Baucau-Dili bele la’o ho normál.

“Ami hato’o preokupasaun ba Governu, se bele buka solusaun ba ami tanba durante ne’e ami kumpre Serka Sanitária durante fulan-lima nia laran no ami-nia atividade mak moris iha estrada,” Aries dehan.

Notísia relevante: Governu hakotu Serka Sanitária iha Baucau, mantein Dili loron hitu

Antes implementa Serka Sanitária, loron ida bus dirasaun Baucau-Dili bele hetan rendimentu $100 resin, maibé iha períodu implementasaun Serka Sanitária, Governu rasik deside hapara movimentu transporte públiku inklui bus.

Governu hakotu ona implementasaun Serka Santária iha Baucau nafatin implementa iha Dili, tanba ne’e bainhira hakarak hakat zona ne’e tenke aprezenta dokumentu kompleta vasina (doze daruak).

Antes ne’e, Governu liuhosi MSSI no INSS kria medida neen hodi fó apoiu ba empregu sira iha territóriu nasionál iha ámbitu pandemia, ne’ebé ba inisiativa ne’e prevee ona orsamentu millaun $45.

Medida hirak ne’e mak hanesan apoiu subsídiu traballadór extraordináriu ba konta ema seluk nian 70%, apoiu subsídiu traballadór ba individuál, emprezáriu individuál, traballadór doméstika, jerente no administrasaun 85%, no traballadór sira ne’ebé dezempregu tanba ema hapara 6%.

Nune’e mós, subsídiu ekstraordináriu ba dezempregu 40%, subsídiu traballadór ba eletresidade 50% no subsídiu ba aluga sira 30%.

Benefisiáriu ne’ebé atu asesu ba medida hirak ne’e tenke rejistu iha INSS, ne’ebé loke rejistu iha loron 04 to’o 15 maiu.

Kona-ba rekezitu ba motorista sira tenke prenxe kritériu hanesan karta kondusan tenke moris, kartaun kondusaun tenke ba morista públiku no labele privadu.

Enkuantu, ba kritériu doméstiku tuir grau hosi 1 to’o 10, ba sira-ne’ebé grau 10 hetan $300 no ida kiik liu hetan $15.

Jornalista : Natalino Belo

Editora    : Julia Chatarina

HAKEREK NO HATÁN

Please enter your comment!
Please enter your name here