Ministru Ensinu Superiór, Siénsia no Kultura (MESSK), Longuinhos dos Santos. Imajen TATOLI/ Egas Cristóvão

DILI, 21 jullu 2021 (TATOLI)–Ministru Ensinu Superiór, Siénsia no Kultura (MESSK), Longuinhos dos Santos, hateten, ekipa téknika ministériu hahú halo avaliasaun proposta hosi Arsebispu Arkidioseze Metropolitana Dili, Don Virgílio do Carmo da Silva, hodi loke universidade katólika iha área Balide.

“Ha’u simu ona proposta no ekipa hahú analiza no halo avaliasaun ba proposta tuir padraun, hafoin ekipa téknika tun ba terrenu  hodi observa tuir rekezitu,” Ministru Longuinhos hateten iha Pálasiu Governu, kuarta ne’e.

Notísia relevante: Dioseze Dili entrega dokumentu ba MESSK molok loke universidade katólika

Tuir padraun, atu loke universidade foun presiza prienxe rekezitu 11 hanesan iha komisaun instaladora, planu estratéjiku, rezultadu estudu viabilidade, preparasaun ba rekursu umanu ka dosente sira, rai, rekursu finaseiru, kurríkulu no fakuldade inklui estudante sira no seluk tan.

“Instituisaun esinu superior privadu no públiku ida atu harii presiza komisaun instaladora ka fundasaun ne’ebé aprezenta vizaun no misaun inklui nia planu estréjiku atu harii universiade,” nia akresenta.

Nune’e, governante ne’e dehan, daudaun ekipa hosi MESSK liuhosi Diresaun Jerál Ensinu Superiór halo avaliasaun ho baze ba rekezitu sira.

Dokumentu ne’e entrega hosi Xefe Instaladora Universidade Katólika Timorense, Belarmino da Silva, ba Diretora Jerál MESSK, Maria Filomena Lay Guterres, ne’ebé akompaña hosi Arsebispu Arkidioseze Metropolitana Dili.

Universidade ne’e sei hahú ho fakuldade rua hanesan fakuldade sosiál kompostu hosi edukasaun, lian no arte, enkuantu fakuldade exata kompostu hosi siénsia no umana, ne’ebé kuandu realiza ona sei loke tan fakuldade siénsia médika no agríkola.

Konstrusaun edifísiu atinje ona 80% no Dioseze Dili mak sei sai na’in ba propriedade sira.

Igreja prepara ona ema 50 ho nível doutoramentu no mestradu atu hanorin iha universidade ne’e, ne’ebé rekursu umanu sira maioria timor-oan, maibé sei envolve mós ema estranjeiru.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here