Médiku Espesialista Medisina Interna, Hélio Guterres, sosializa programa vasinasaun COVID-19 ba komunidade iha Suku Bairru-Pité, postu administrativu Dom Aleixo, kuarta (21/07). Imajen Tatoli/Francisco Sony.

DILI, 21 jullu 2021 (TATOLI)—Komisaun Interministeriál ba Implemetasaun Vasina COVID-19 iha Timor-Leste, hala’o abertura ba planu kampaña vasinasaun iha sede suku Bairru-Pité, postu administrativu Dom Aleixo, munisípiu Dili, kuarta ne’e.

Reprezentante Komisaun Interministeriál, Élio Guterres enkoraja komunidade iha sede suku Bairru-Pité atu hakbesik an ba sentru saúde hodi simu vasina, nune’e bele prevene-an hosi COVID-19.

Notísia relevante:MS sei lansa kampaña konjunta munisipál vasinasaun COVID-19

“Ita-nia nasaun viziñu-sira ema mate barak loos ona. Tanba ne’e ha’u enkoraja atu ita hotu simu vasina, tanba liuhosi vasina mak ita bele prevene-an hosi COVID-19,” Elio Guterres husu.

Iha fatin hanesan Sekretáriu Adjuntu Munisípiu Dili, António Clão hodi prezidente autoridade munisípiu Dili nia naran, agradese ba Governu liuhosi Ministra Saúde (MS) ho ekipa ne’ebé prontu suporta autoridade komunitária-sira hodi la’o hamutuk no hakbesik-an nafatin ba komunidade atu  tuir vasina.

Totál populasaun iha Postu Administrativu Dom Aleixo hamutuk 85.270, no hosi totál populasaun ne’e, ema ne’ebé simu ona vasina hamutuk 36.305 no seidauk simu vasina hamutuk 48.965.

Parte Suku Bairru-Pité  totál populasaun hamutuk 27.228 no sira ne’ebé simu ona vasina hamutuk 11.921 no seidauk simu vasina hamutuk 15.307.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here